Elordada jaqynda ashylǵan Gastronomiialyq ortalyqta Astana Food Fest festivaliniń qyzyqty ótýine túrli ulttardyń taǵamdaryn daiyndap, usynatyn 30-dan astam tanymal qoǵamdyq tamaqtaný oryndary da atsalysty.
Kesh qonaqtaryna mádeni-oiyn-saýyqtyq baǵdarlama usynylyp, belgili restoratorlar óz jetistikteri týraly aqparattarmen bólisti.
– Qurmetti qala turǵyndary men qonaqtary, mundai is-sharalardyń týrizmdi damytýdaǵy mańyzy zor. Sońǵy jyldary týrister qundylyǵy ózgerdi, qazir gastronomiialyq týrizm qarqyndy damýda. Týristerdiń 40 paiyzy basqa elderge osy maqsatta baratyny belgili. Sebebi belgili bir eldi onyń ulttyq taǵamdary arqyly tanýǵa bolady.
Elordanyń da gastronomiialyq týrizm ortalyǵy retinde damýyna áleýeti jetedi. Qazirgi tańda bas qalada 1765 qoǵamdyq tamaqtaný orny jumys istese, sonyń ishinde 298 meiramhana, 534 kafe, 93 bar, 539 ashana jáne 301 ózge de nysandar bar.
Búgin festival ótip jatqan Gastronomiialyq ortalyq týrister men elorda qonaqtarynyń eń kóp shoǵyrlanatyn demalys ornyna ainalaryna senim mol, – dedi qala ákiminiń orynbasary Erlan Bekmýrzaev festivaldiń ashylý saltanatynda.
Osy demalys kúnderi Gastronomiialyq ortalyqqa kelgen astanalyqtar fýd-festival uiymdastyrýshylarynyń túrli konkýrstar men prianikterdi boiaý, jyldam tamaq jeý, viktorinalar, mamandardyń sheberlik synyptary siiaqty túrli is-sharalarǵa qatysty.
– Elordada mundai sharalardy ótkizýge arnalǵan oryndardyń paida bolǵany qýantady. Endi olardyń qatary arttyrý kerek. Dál osyndai festival jaz ailarynda da ótkeni durys. Keletin qonaqtar úshin bul úlken mereke. Óitkeni ol bir nysannyń ishinde túrli taǵamdardan dám tatady. Búgin olar meniń amerikandyq taǵamdarymnyń dámin kóredi, erteń jigitterden Gavaii taǵamdarynyń dámin kórse, birisi kúni naýbaihanaǵa barady. Sondyqtan biz úshin jalǵa alýshylardyń árqaisysynyń jaqsy jáne sapaly jumys isteýi óte mańyzdy, – dedi gastro-korner iesi Rýslan Ábishev.
Sonymen qatar, balalarǵa tátti taǵamdardy ádemi bezendirýden sheberlik sabaqtary ótkizilip, kofe daiyndaýdan eń ozyq barister qabilet-qarymyn kópshilik aldynda kórsetti.
Hot-dog pen býrgerdi jyldam jep taýysýdan jarysqandar da, basqa da qatysýshylar is-shara demeýshileri atynan túrli syilyqtarǵa ie boldy. Live-bend jáne Di-djeiler kóńildi zamanaýi áýenmen kelýshilerge merekelik kóńil-kúi syilady.
Gastronomiialyq ortalyqta qazaq taǵamynan bastap bólek álemniń 28 ulttyq taǵamdarynyń dámin tatýǵa bolady.
