Almatyda jyl sońyna deiin 8 jańa qonaqúi ashylmaq. Osylaisha, megapolistiń týristerdi qabyldaý múmkindigi keńeiedi, dep habarlaidy dalanews.kz Almaty.tv-ǵa siltep.
Almatyǵa keletin saiahatshylar qatary artqan saiyn suranys ta ulǵaiyp keledi. Jyl basynan beri shaharda 26 jańa qonaqúi ashyldy. Qazir qalada týristerdi qabyldaityn jalpy 448 nysan jumys isteidi. Olar bir mezette 26,5 myńnan asa meimandy ornalastyra alady. Bul baǵyttaǵy jumys aldaǵy jyldary da jalǵaspaq. Qazir shaharda taǵy 87 qonaqúi jobasy ártúrli kezeńde tur.
"Týrizmniń damýy eń aldymen infraqurylymǵa bailanysty. Sondyqtan qaladaǵy qonaqúi qoryn keńeitip qana qoimai, onyń sapasyn da arttyrýymyz qajet. Buǵan Almatynyń áleýeti jetkilikti. Sonymen qatar, álemdik brendterdi tartýǵa basymdyq bergen jón. Qyzmet kórsetý deńgeiin kóterip, Almatynyń halyqaralyq týristik baǵyt retindegi básekege qabiletin arttyrý da mańyzdy", – dedi Qazaqstan qonaqúileri men meiramhanalary qaýymdastyǵynyń prezidenti Rashida Sháikenova.
Mamandardyń boljamynsha, 2028 jyldyń sońyna qarai Almatydaǵy qonaqúi nómirleriniń sany 1,4 esege artady. Mundai qarqyn eń aldymen shaharǵa saiahattaýshylar qatary kóbeiýimen bailanysty.
Byltyr Almatyǵa 2,5 millionǵa jýyq týrist kelgen. Onyń 800 myńǵa jýyǵy - shetel azamattary. Sarapshylardyń dereginshe, sheteldik týristerdiń Almatydaǵy shyǵyny 40 paiyzǵa artqan.
