قارجى نارىعىن رەتتەۋ جانە دامىتۋ اگەنتتىگى وكىلدەرى ميكروقارجىلاندىرۋ جانە كوللەكتورلىق قىزمەتتەر سالاسىندا ءوزىن-وزى رەتتەۋ ينستيتۋتىن ەنگىزۋ باستاماسىن تالقىلادى، دەپ حابارلايدى Dalanews.kz.
بۇگىنگى كۇنى ميكروقارجىلاندىرۋ سەكتورىندا 899 سۋبەكت جۇمىس ىستەيدى. كوللەكتورلىق اگەنتتىكتەردىڭ تىزىلىمىندە 197 ۇيىم بار. 2025 جىلدىڭ 1 شىلدەدەگى جاعدايى بويىنشا ۇيىمداردىڭ نەسيە پورتفەلى 3،2 ترلن تەڭگەنى قۇراپ، 2021 جىلدان بەرى 2 ەسەدەن استام ءوستى. بۇل رەتتە نەسيە پورتفەلىنىڭ 61%-ى نەمەسە 1،9 ترلن تەڭگە بيزنەسكە ميكروكرەديتتەرگە تيەسىلى.
قنردا 2024 جىلدان باستاپ قاداعالاۋ سۋبەكتىلەرىنە قاتىستى 812 جانە 730 قۇجاتتامالىق تەكسەرۋ جۇرگىزىلدى، ونىڭ قورىتىندىسى بويىنشا 140 قاداعالاۋ شاراسى قولدانىلعانىن، 431 ملن تەڭگە سوماعا 1 175 ايىپپۇل شىعارىلعاننىن ناقتىلايدى.
"تەكسەرۋ ناتيجەلەرى بۇزۋشىلىقتار تەك ميكروكرەديتتەر بەرۋ ماسەلەلەرىمەن عانا ەمەس، سونىمەن قاتار ولاردىڭ قىزمەتىنىڭ باسقا اسپەكتىلەرىمەن بايلانىستى ەكەنىن كورسەتىپ وتىر. وسىنى ەسكەرە وتىرىپ، اگەنتتىك جۇيەلى شارا رەتىندە مىندەتتى ءوزىن-وزى رەتتەۋدى بەلگىلەۋ جولىمەن ميكروقارجىلاندىرۋ جانە كوللەكتورلىق قىزمەتتەر سۋبەكتىلەرىن قاداعالاۋدىڭ ەكى دەڭگەيلى جۇيەسىن ەنگىزۋدى ۇسىنادى"، - دەدى ءمادينا ءابىلقاسىموۆا.
اگەنتتىكتىڭ بانكتىك ەمەس ۇيىمداردى رەتتەۋ دەپارتامەنتىنىڭ ديرەكتورى نۇرجان بيدايبەك قازاقستاندا ءورۇ ەنگىزۋدىڭ نەگىزگى باعىتتارى تۋرالى بايانداما جاساپ، حالىقارالىق تاجىريبە وسى قۇرالدىڭ نارىقتاعى ورنىقتىلىق پەن ءتارتىپتى قامتاماسىز ەتۋدەگى تيىمدىلىگىن كورسەتىپ وتىرعانىن اتاپ ءوتتى.
