ەل تىنىشتىعى ءۇشىن وپات بولعان ازاماتتاردىڭ رۋحى شات بولسىن! ولاردىڭ وتباسى مەن تۋعان-تۋىستارىنا قايعىرىپ كوڭىل ايتامىز.
ەل ىشىنە بۇلىك سالۋدىڭ ءبىر ساتتە ەكەنىنە كوزىمىز جەتتى. تىنىشتىقتىڭ تال بەسىگىن شايقاپ، تۇراقتىلىقتىڭ بايتەرەگىن قۇلاتپاق بولعان ارام نيەتتىلەر بەيبىتشىلىك پەن بىرلىكتى كوزىنىڭ قاراشىعىنداي ساقتاپ وتىرعان مەملەكەتىمىزدى الا تايداي بۇلدىرمەك بولدى. تاۋەلسىزدىگىمىزگە، اڭساپ جەتكەن ازاتتىعىمىزعا الاكوزدەنە قاراعانداردىڭ حالىق اراسىنا ۇرەي سالىپ كەتكەنى جاسىرىن ەمەس.
دەگەنمەن پرەزيدەنت قاسىم-جومارت كەمەل ۇلى توقايەۆتىڭ شۇعىل ءارى دۇرىس شەشىم قابىلداۋىنىڭ ارقاسىندا لاڭكەستەر سالعان لاڭ اۋىزدىقتالىپ، ەلىمىزدە تۇراقتىلىق قايتا قالپىنا كەلىپ جاتىر.
ءبىز ءقازىر الاۋىز بولاتىن، ءبىر-بىرىمىزدى ايىپتايتىن، ءبىرىمىز ەكىنشىمىزگە وكپە ارتاتىن ساتتە ەمەسپىز. تارازى باسىندا تاۋەلسىزدىك تۇرعاندا حالقىمىز ءبىر ءۇيدىڭ بالاسىنداي، بەس ساۋساقتىڭ سالاسىنداي بىرىگىپ، بۇزىلماعان وتىز ەكى تىستەي تۇتاسىپ، ەلىمىزدىڭ تىنىشتىعى ءۇشىن كۇرەسەتىن كۇردەلى كەزەڭدەمىز. سوندىقتان بارشامىز مەملەكەت باسشىسىنىڭ اينالاسىنا توپتاسىپ، ءاربىر قازاقستاندىق ازامات توتەنشە جاعدايدىڭ تالاپتارىن قاتاڭ ساقتاپ، ەلدەگى تۇراقتىلىقتى قالپىنا كەلتىرۋگە قال-قادىرىنشە اتسالىسىپ، بىرلىك پەن بەيبىت ءومىردىڭ جولىندا ارەكەت ەتۋى كەرەك.
دۇربەلەڭ كەزەڭدى، بۇلاعاي زاماندى ءبارىمىز ءبىر بولىپ قانا ەڭسەرە الامىز. اركىمنىڭ ويى، پىكىرى، ساياسي ۇستانىمى ءارتۇرلى بولۋى زاڭدىلىق. ءبىراق ءدال قازىرگى ساتتە ونىڭ بارلىعىن ىسىرىپ تاستاپ، ءبىر بولۋدىڭ قامىن جاساعانىمىز ابزال. ويتكەنى تاعدىردىڭ ءتاتتى سىيى تاۋەلسىزدىكتى تارك ەتىپ الساق، بابالار ارۋاعى دا، بولاشاق ۇرپاق تا ءبىزدى كەشپەيدى.
ەلىمىزدىڭ ءىشى داۋدان، سىرتى جاۋدان امان بولسىن!
قىرىمبەك كوشەربايەۆ،
مەملەكەت جانە قوعام قايراتكەرى.
