گەرمانيادا زورلىق-زومبىلىقپەن قازا تاپقان ەكس-سۋديا ايگۇل سايلىبايەۆانىڭ ولىمىنە قاتىستى قىلمىستىق ءىس بويىنشا تەرگەۋ جالعاسۋدا. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى،- دەپ حابارلايدى Dalanews.kz
ونىڭ ايتۋىنشا، گەرمانيانىڭ قۇقىق قورعاۋ ورگاندارى بۇل فاكتى بويىنشا كىسى ءولتىرۋ بابىمەن ءىس قوزعاعان. تەرگەۋ بارىسىندا مارقۇمنىڭ ەنەسى – 49 جاستاعى ناتاليا دونسوۆا باستى كۇدىكتى رەتىندە تانىلىپ وتىر. دارمشتادت قالاسىنىڭ سوتى ونى قاماۋعا الۋ تۋرالى وردەر شىعارعان، الايدا قازىرگى ۋاقىتتا ونىڭ قايدا ەكەنى بەلگىسىز. وسىعان بايلانىستى دونسوۆاعا حالىقارالىق ىزدەۋ جاريالانعان.
"تەرگەۋ جالعاسىپ جاتىر. گەرمانيا تاراپى قىلمىستىق ءىستىڭ ماتەريالدارىن مارقۇمنىڭ تۋىستارى مەن ادۆوكاتىنا تاپسىردى. تەرگەۋ مۇددەسىندە ساي جانە تاراتۋعا بولمايتىن مالىمەتتەردىڭ تاراپ كەتۋىنە جول بەرمەۋ ماقساتىندا نەمىس تاراپى بۇل ىسكە قاتىستى ەگجەي-تەگجەيلى مالىمەتتەردى جاريا ەتپەي وتىر"، - دەدى ايبەك سمادياروۆ ب ا ق وكىلدەرىنە ارنالعان بريفينگتە.
ەسكە سالايىق، 2023 جىلدىڭ ماۋسىم ايىندا گەرمانيانىڭ بەنسحايم قالاسىنىڭ شەتىندە 40 جاستاعى ايگۇل سايلىبايەۆانىڭ زورلىق-زومبىلىق بەلگىلەرى بار ءمايىتى تابىلعان ەدى. ب ا ق مالىمەتتەرىنە سايكەس، ونىڭ دەنەسىندە پىشاق جاراقاتتارى بولعان. سول كۇنى ايگۇل سايلىبايەۆامەن بىرگە ونىڭ ەنەسى ناتاليا دونسوۆا دا جوعالىپ كەتكەن. سوڭعى رەت دونسوۆا نەمەرەسىن بالاباقشادان الىپ، ۇيىنە اكەلگەن. سول ۋاقىتتان بەرى ناتاليا دونسوۆادان ەش حابار جوق.
ايگۇل سايلىبايەۆا – بۇرىن استانادا سۋديا بولىپ قىزمەت ەتكەن، شەففيلد ۋنيۆەرسيتەتىندە ءبىلىم العان. سوڭعى جىلدارى وتباسىمەن بىرگە گەرمانيادا تۇرعان.
