استانا قالاسىندا ءوتىپ جاتقان V دۇنيەجۇزىلىك كوشپەندىلەر ويىندارىندا وتاندىق 450 شەبەر رەكورد ورناتتى. ولار «گاۋھارتاس»، «سىنىق ءمۇيىز» جانە «الامان» قۇراق تەحنيكالارى بويىنشا 11 200 شارشى مەتر كورپەشە قۇراپ، «كينەس» قازاقستان رەكوردتار كىتابىنا ەندى، دەپ حابارلايدى Dalanews.kz تۇركىستان وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
ەل ابىرويىن اسىرعان شەبەرلەر قاتارىندا سوزاق اۋدانى، شوقان ءۋاليحانوۆ اتىنداعى جالپى ءبىلىم بەرەتىن مەكتەپتىڭ كوركەم ەڭبەك ءپانىنىڭ ءمۇعالىمى اقبىلەك بايتەمىر قىزى دا بار. ايتا كەتەيىك، 8-14 قىركۇيەك ارالىعىندا ءوتىپ جاتقان ايتۋلى شاراعا الەمنىڭ 85 ەلىنەن 4 000-عا جۋىق سپورتشى قاتىسۋدا. سپورت جارىسىنان بولەك بۇل شارانىڭ ماقساتى - وتاندىق ءتۋريزمدى، ەتنومادەنيەتتى دامىتۋ.
