ءبىر اتاعىنان ايىرىلعان بوكسشى جانىبەك ءالىمحان ۇلى الەۋمەتتىك جەلىدە مالىمدەمە جاسادى، دەپ حابارلايدى Dalanews.kz.

سپورتشى قولداۋ كورسەتكەن قالىڭ قازاققا العىس ءبىلدىردى.

"سىنالدىق، ءبىراق سىنبادىق! كەرىسىنشە شىڭدالدىق! شەشىمدەر شىقتى، IBF كەتتى، WBO قالدى.  قالاي بولعاندا دا ءقازىر مەن WBO نۇسقاسى بويىنشا ورتا سالماقتا الەم چەمپيونىمىن! 1 تيتۋل ساقتالدى! اللاعا شۇكىر! بۇيىرتسا 8 ايدان سوڭ رينگكە شىعامىن! ۇلكەن جورىق جالعاسادى. قۇداي جاراتقان توبەنى كەتپەن شاۋىپ بىتە المايدى! قۇداي جاققان وتتى ادام ۇرلەپ وشىرە المايدى! ءبىز ءالى اياقتامادىق، مەنىڭشە، ءبارى ەندى باستالاتىن سياقتى! كاسىپقوي بوكس بىرەۋلەر ءۇشىن سپورت بولسا، كەيبىرەۋلەر ءۇشىن تەك بيزنەس! ءبىز سپورت جاعىندامىز! ءبىز قازاقىلىق باعىتىندامىز! قازاناتتىڭ جولىندا جازىق تا بار، ور دا بار، ازاماتتىڭ جولىندا باقىت تا بار، سور دا بار! بۇل - ءومىر زاڭى! ءار قيىندىقتان سوڭ قۋانىش بارىن ۇمىتپايمىز! مەن دوپينگكە قارسىمىن! مۇنى بۇرىن دا ايتقانمىن، ءقازىر دە ايتامىن! وتكەن نارسە ءوتتى، بىتكەن نارسە ءبىتتى! تالقىلاي بەرگەننەن، ۋايىمداي بەرگەننەن تاعدىر وزگەرمەيدى. ەڭ باستىسى ەل مەنىڭ كىم ەكەنىمدى، قانداي بوكسشى ەكەنىمدى جاقسى بىلەدى! ارداقتى اعايىن، ءبىز ءالى الەم چەمپيونىمىز! الدىمىزدا تالاي دودا كۇتىپ تۇر! جەڭىستى كۇندە جۇزدەسەيىك! قولداۋلارىڭىزعا راقمەت"، - دەدى ول.

2025 جىلعى جەلتوقساندا جانىبەك ءالىمحان ۇلى دوپينگ سىناماسىنان وتە الماعان ەدى.

ەسكە سالايىق، بۇعان دەيىن حالىقارالىق بوكس فەدەراسياسى (IBF) قازاقستاندىق بوكسشى جانىبەك ءالىمحانۇلىن ورتا سالماقتاعى الەم چەمپيونى اتاعىنان ايىردى.