ءساۋىردىڭ باسىندا سامارقاند وبلىسىندا كوشە تازالاۋعا شىققان 28 جاستاعى ءمۇعالىم ديانا ەنيكەيەۆانى كولىك قاعىپ، مەرت قىلعان.
ميرزيايەۆ ءمۇعالىمنىڭ ولىمىنە "ءوزىن كىنالادى".
"سوڭعى رەت ەسكەرتەمىن..."
"سامارقاندتاعى ءمۇعالىمنىڭ ءولىمى تۋرالى ەستىدىم. مەكتەپ ديرەكتورى، اكىم ەكى-ۇش كۇن بۇرىن قوناق كەلەدى دەپ ايتقان. جۇرەگىمنىڭ تۇبىندە ءمۇعالىمنىڭ ولىمىنە ءوزىمدى كىنالايمىن.
سوڭعى رەت ەسكەرتەمىن، كىمدە-كىم مۇعالىمدەردى، دارىگەرلەردى جانە ستۋدەنتتەردى ەركىنەن تىس جۇمىسقا تارتسا، قاتاڭ جازالانادى.
قىزمەتىنەن قۋىلۋ بىلاي تۇرسىن، زاڭ الدىندا جاۋاپ بەرەدى. ونىڭ سىڭىرگەن ەڭبەكتەرى بولار، ءبىراق وعان قارامايمىن. وسىنداي ىستەر قايتالانا بەرگەن سوڭ تاعى ايتۋعا ءماجبۇرمىن" دەدى وزبەكستان پرەزيدەنتى.
ميرزيايەۆ ءار ايماققا ساپارى الدىندا اكىمدەردىڭ كوزبوياۋشىلىق جاسايتىنىن دا سىنادى.
"ءار ايماققا بارار الدىندا ول جاقتاعى جاعدايمەن تانىسامىن. ءبىراق ايماقتاردا كوزبوياۋشىلىق كوپ. شىنىمدى ايتسام، وسىنىڭ بارلىعى جيىركەنىشتى.
مۇعالىمدەر مەن دارىگەرلەردى كوشە تازالاۋعا شىعارۋ – ماعان جانە ەلدەگى ساياساتقا جاسالعان ساتقىندىق.
ەلدەگى قاي كوشەنى جۋىپ، تازالاعانىن ءبىلىپ وتىرامىن. حالىقتى كوشە تازالاۋعا شىعارۋ ارقىلى سىزدەر العىس المايسىزدار، قارعىس الاسىزدار. ءبىزدىڭ دوستارىمىزبەن قاتار جاۋلارىمىز دا بار. سىزدەر وسى ىستەرىڭىز ارقىلى جاۋلارىمىزعا كومەكتەسەسىزدەر" دەدى ول سايحۋناباد اۋدانىنىڭ اكىمدىگىنىڭ قىزمەتكەرلەرىمەن كەزدەسۋدە.
ميرزيايەۆ ءار ايماققا بارعاندا، جينالىستاردا "الدىن-الا دايىنداپ قويعان ادامداردىڭ ماقتاۋ مەن ماداق سوزدەرىنەن" شارشاعانىن دا ايتتى.
"شىن جۇرەگىمنەن ايتامىن، ەگەر دوسىم بولساڭىزدار مۇنداي ىستەردى دوعارىڭىزدار. بۇرىننان بەرى قوردالانعان ماسەلەلەردى جارتى جىلدا شەشە المايتىندارىڭىزدى بىلەمىن.
جينالىستاردا ارنايى دايىندالعان ادامدار شىعىپ سويلەگەنىن كورگەندە ەش سەنىمىم قالمايدى.
مەن قاراپايىم حالىقتى، ولاردىڭ ماسەلەسىن تىڭداۋعا كەلەمىن" دەدى ول.
حالىقارالىق ادام قۇقىعى ۇيىمدارى وزبەكستاندى بيۋدجەتتىك قىزمەتكەرلەردى مىندەتىنەن تىس جۇمىستارعا شىعارعانى ءۇشىن ءجيى سىنايدى. مۇعالىمدەر مەن دارىگەرلەردى قۇرىلىس، جوندەۋ جۇمىستارىنا، ماقتا جيناۋعا، كوشە تازالاۋعا شىعارۋ مارقۇم بولعان پرەزيدەنت يسلام كاريموۆ تۇسىندا ءجيى بايقالعان. 2017 جىلى وزبەكستان پرەمەر-مينيسترى ابدۋللا اريپوۆ ماقتا تەرىپ جۇرگەن مۇعالىمدەر مەن ستۋدەنتتەردى قايتارۋدى تالاپ ەتكەن.
قازاقستانداعى جاعداي
قازاقستاندا دا مۇعالىمدەر مىندەتىنەن تىس جۇمىسقا جەگىلەتىندەرىن، ديرەكتورلار گازەتتەرگە قيناپ جازدىراتىنىن ايتىپ، ءجيى شاعىمدانادى. 2017 جىلى ەلدەگى مۇعالىمدەر استاناداعى ەكسپو كورمەسىنە كۇشتەپ بيلەت العاندارىن جەتكىزگەن.
2015 جىلى الماتى وبلىسى ۇزىناعاش اۋىلىنداعى مۇعالىمدەر ازاتتىققا قازاقستان پرەزيدەنتىن سايلاۋى الدىندا كوشە تازالاۋعا ءبىر اپتاعا سەنبىلىككە شىققاندارىن ايتقان.
الماتى وبلىسىنىڭ قاراساي اۋدانى جاڭاتۇرمىس اۋىلدىق مەكتەبىنىڭ ءمۇعالىمى ايمان ساعيدۋللا دا بىرنەشە رەت ەركىنەن تىس سەنبىلىككە شىققانىن، سايلاۋ كەزىندە ءار ءۇيدى ارالاپ، اۋىل تۇرعىندارىن سايلاۋعا شاقىرعانىن ايتقان. ول "وزىنە قىسىم جاساعان" مەكتەپ ديرەكتورىمەن سوتتاسىپ، جەڭگەن.
شىمكەنتتىڭ ەڭبەكشى اۋداندىق سوتىنىڭ سۋدياسى سۆەتا نۇربەكوۆا №38 مەكتەپتىڭ ءمۇعالىمى، "مىندەتىنەن تىس جۇمىسقا تارتىلىپ، ديرەكتوردان قىسىم كورگەنىن" ايتقان گۇلجان سالىمبايەۆا مەكتەپ باسشىسىن سوتقا بەرگەن. ءبىراق سوت ونىڭ شاعىمىن قاناعاتتاندىرماعان.
2017 جىلى قازاقستاننىڭ ءار ايماعىندا تۇراتىن، وزدەرىن «تاۋەلسىز» اتايتىن مۇعالىمدەر الەۋمەتتىك جەلىدە ۇيىمداسىپ، قىسىم كورگەن ارىپتەستەرىنىڭ قۇقىعىن بىرىگىپ قورعاي باستادى.
دەرەككوز: ازاتتىق راديوسى
