كييەۆ رەسەيدىڭ مادەني كەڭىستىگىنەن ءبىرجولاتا شىعىپ كەتتى.
بۇعان دەيىن ۋكراينا بيلىگى تەلەارنالاردىڭ رەسەي فيلمدەرىن كورسەتۋگە ۇزىلدى-كەسىلدى تىيىم سالعانى ەسىمىزدە. ءبىراق رەسەيگە تۇمسىعىن سوزىپ، جەل قارمايتىن كەيبىر تەلەارنالار ەسكى "ادەتىنە" باسىپ، جاڭا جىل كەزىندە "يرونيا سۋدبى" ءفيلمىن كورسەتىپ، باستارى داۋعا قالدى.
بيلىكتىڭ تەلەارانالارعا بايلانىستى ۇستانعان بۇل ساياساتى دۇرىس پا؟ بىزدىڭشە، دۇرىس. ءيا، "يرونيا سۋدبى" فيلمىندە پۋتين ساياساتىن ناسيحاتتايتىن ەشقانداي ەپيزودتار جوق.
ءبىراق بۇل – فيلم كەڭەستىك زامانداعى مادەنيەت پەن قۇندىلىقتاردى ناسيحاتتايتىن، ۋكرايندىقتارعا كەزىندە كەڭەستىڭ جۇيەنىڭ ءبىر پۇشپاعى بولعانىن ەسكە سالاتىن تۋىندى ەمەس پە؟
ويلاڭىزشى، ورىستاردان ءبىراز ءزابىر كورگەن پولشا بيلىگى ءدال وسى فيلم وتە كەرەمەت ونەر تۋىندىسى بولسا دا، ەفيرىنە جىبەرەر مە ەدى؟ پولياكتاردا بۇل ءفيلمدى مۇلدە كورسەتپەيدى.
مىنە، ۋكراينا (ءبىز دە) رەسەي ىقپالىنان ارىلۋ ءۇشىن ونىڭ جاقسى، جامان دۇنيەسىنەن تولىقتاي ارىلۋى كەرەك.
وسىعان دەيىن رەسەي مەن ۋكراينانىڭ شوۋ-بيزنەسى توننىڭ ىشكى باۋىنداي ارالاسىپ كەلدى. ۋكراينانىڭ ايگىلى ءانشىسى سوفيا روتارۋ ءوزىن اللا پۋگاچيەۆانىڭ باستى باسەكەلەسى ساناسا، روك باعىتىندا ءان ايتاتىن «وكەان ەلزى» توبى ءوزىنىڭ جۇرەك تەبىرەنتەر اندەرىن ورىس تىلىندە شىرقاپ كەلەدى.
ال «ۆەركا سەرديۋچكا» بولىپ رەسەيدەگى مىڭداعان كورەرمەندەردىڭ جۇرەگىنە جول تاپقان، اندرەي دانيلكو بىلايعى جۇرت ورىستاردىڭ ءارتىسى دەپ تانيتىنى بەلگىلى.
قازاقتا ورىسقا قارسى يممۋنيتەت قالىپتاستى
ال قازاقستاندا مۇنىڭ ءبىرى دە جوق. كەڭەس زامانىنىڭ وزىندە ورىستار قازاقتاردى كەمسىتىپ، توبەدەن تۇيگىشتەپ وتىردى. مىنە، سونىڭ پايداسىن بۇگىن كورەتىن مۇمكىندىك تۋىپ كەلەدى.
ورىستاردىڭ قازاقستاندا مادەني احۋالدىڭ قاي باعىتتا دامىپ جاتقانىن بىلمەۋى، كرەملدىڭ بىزگە باعىتتاعان يدەولوگياسىمەن ءتيىمدى كۇرەسەتىن مۇمكىندىككە يە بولىپ، يممۋنيتەت قالىپتاسىپ كەلەدى.
بىرەۋلەر «قايرات نۇرتاستىڭ نيۋشامەن قوسىلىپ ءان ايتىپ، ورىس مادەنيەتىنىڭ شاشباۋىن كوتەردى» دەپ ايتىپ جۇرگەنىن بىلەمىز. بۇل جەردە قايتا قايرات نيۋشانى پايدالانىپ، ەلىمىزدەگى ورىس ءتىلدى قاۋىمنىڭ نازارىن وزىنە اۋدارۋعا (قازاق شوۋ-بيزنەسىنە) تىرىسقانىن بايقاۋعا بولادى.
وسىلايشا ءبىزدىڭ رەسەيمەن اراداعى مادەني بايلانىسىمىز كۇن وتكەن سايىن كومەسكى تارتىپ كەلەدى.
قانداسىمىز ارمان داۆلەتياروۆتىڭ استانادا «مۋز-تۆ» بايقاۋىن ۇيىمداستىرۋى ءقازاقتىلدى اۋديتوريانىڭ قولداۋىنا يە بولعان جوق.
سول كەزدە ساكەن مايعازييەۆتىڭ: "بۇعان، ءبىز بارمايمىز! پرەمياسى وزىنە، ول قازاقتىڭ «مۋزارت»-قا دەگەن ماحابباتىنان بيىك ەمەس. قازاقتىڭ مادەنيەتىن، حالىقتىق مۋزىكاسىن، ءداستۇرلى ءانىن دارىپتەۋ، مىنە، بىزگە وسى ابىروي!»، – دەپ كەسىپ ايتقانىنان ورىستىڭ شوۋ-بيزنەسى قازاق توپىراعىندا وركەن جايۋ مۇمكىندىگىنەن تولىقتاي ايىرىلعانىن بايقاۋعا بولادى.
رەسەيدىڭ ايگىلى بايقاۋى «مۋزارت-تى» قىزىقتىرماسا، ىرگەدەگى كورشىمىزدىڭ مادەني ەكسپانسياسى ءارقاشان ساتسىزدىككە ۇشىرايتىنىن باعامداۋعا بولادى.
بۇگىنگى قازاق قوعامى ءۇشىن تورەشتىڭ اينالاسىندا بولىپ جاتقان وقيعالار قىزىقتى.
سوندىقتان تورەعاليدىڭ ءاربىر ءانى، ءاربىر PR قادامى ءبىزدى رەسەيدەن الىستاتىپ، ونىڭ مادەني ەكسپانسياسىنان قورعايتىنىن ەشقاشان ەستەن شىعارماۋىمىز كەرەك.
بۇگىنگى ءبىزدىڭ شوۋ-بيزنەسىمىز (ونىڭ ساپاسى جايىندا ءسوز باسقا)، تويشىل قاۋىمىمىز ورىس مادەنيەتىنەن ءبىزدى كۇن وتكەن سايىن الىستاتۋدا. ءقازىر كەيبىر ورىستاردىڭ وزدەرى دومبىرا شەرتىپ، قازاق تىلىندە پوپۋريي ايتىپ، قازاقىلانىپ جاتقانىن ءبارىمىز بىلەمىز. سوندىقتان قازاق شوۋ-بيزنەسىنىڭ قازانىن قايناتىپ جۇرگەن تورەش باستاعان انشىلەرىمىزگە العىس ايتۋىمىز كەرەك.
https://dalanews.kz/del-qazir/81104-zhemqorlardyng-kapitaly-igi-maqsatqa-zh
