«بايتاق-بولاشاق» ەكولوگيالىق اليانسىنىڭ ءتوراعاسى، ۇلتتىق قوعامدىق سەنىم كەڭەسىنىڭ مۇشەسى ازاماتحان ءامىرتاي فەيسبۋكاتاعى پاراقشاسىندا وزىنە بەلگىسىز بىرەۋلەر حابارلاسىپ، «ساعان بايلانىستى كومپرومات بار» دەپ قوقان-لوقى جاساعانىن ايتتى.

قوعام بەلسەندىسى ءوزىنىڭ الەۋمەتتىك جەلىدەگى جازباسىندا بىلاي دەيدى:

– كەشە تۇندە (18 اقپان كۇنى) ساعات 11:15-تە بەلگىسىز نومەرمەن بىرەۋ ماعان حابارلاستى. «قولىمىزدا ساعان بايلانىستى كومپرومات بار. ويلان، وتباسىڭ، ايەلىڭ، بالالارىڭ بار» دەگەندەي ۇركىتە سويلەدى. سونداي-اق، ايەلىمەدە سول كەزدە بەلگىسىز نومەردەن وسى تاقىلتەس حابارلاما كەلدى.

سوڭعى كەزدە ءبىر اڭعارعانىم، بەلگىسىز بىرەۋلەر سوڭىما ءتۇسىپ، نە ىستەپ، نە قويىپ جۇرگەنىمدى ەسەپكە الىپ جۇرگەن سەكىلدى.

بۇل نە سوندا؟ قورقىتۋ ما، ۇركىتۋ مە؟ كىمگە بوگەت بولدىم، كىمنىڭ جولىن كەستىم؟ تۇسىنبەدىم.

مەن بيلىككە قارسى بۇلىك ۇيىمداستىرىپ جۇرگەن ادام ەمەسپىن.

ءيا، مەن قوعام بەلسەندىسىمىن. تابيعات جاناشىرىمىن. ەلىمىزدىڭ ەكولوگيالىق اۋحالى مەن تولعاندىرادى.

سول ءۇشىن جاسىلدار پارتياسىن قۇرعىم كەلىپ جۇرگەنى راس. سونداي-اق قوعامدا ورىن الىپ جاتقان ادىلەتسىزدىككە كوز جۇمىپ قاراي المايمىن. سوعان بايلانىستى ويىمدى اشىق تۇردە ءار جەردە ايتىپ ءجۇرمىن.

وتكەندەگى قوردايداعى دۇربەلەڭگە ارنايى باردىم. كوردىم. وقيعانىڭ نەدەن بولعانىنا كوز جەتكىزۋگە تىرىستىم. ويىمدى الەۋمەتتىك جەلىگە جازدىم. بالكىم وسى تىرلىگىم، وزگەدە ماسەلەلەر بويىنشا ايتقاندارىم بىرەۋلەرگە ۇناماۋى مۇمكىن. بۇل سولاردىڭ اركەتى بولار دەگەن ويدامىن.

مەن بەلگىسىز بىرەۋلەردىڭ وتباسىمنىڭ تىنىشتىعىن بۇزىپ، ارانداتۋشىلىق جاساۋىنا قارسىمىن. مەن ەلىمنىڭ پاتريوتىمىن، ارىم تازا اداممىن. مۇنداي جاسىرىن تۇردە قوقان-لوقى جاساۋعا، قورقىتىپ-ۇركىتۋگە توزبەيمىن. كىمدە بولسا، اشىق الدىما كەلىپ، نە كوزدەگەنى بارىن ايتقانى ءجون. ال، ولاي بولماسا، اڭگىمە باسقا بولادى. ەشكىمنىڭ وتباسىمدا حاقىسى بولۋى ءتيىس ەمەس، – دەپ «بايتاق-بولاشاق» ەكولوگيالىق اليانسىنىڭ ءتوراعاسى ءوزىنىڭ پاراقشاسىندا جازبا قالدىرىپتى.

 

[caption id="attachment_50567" align="aligncenter" width="578"] ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟[/caption]