دەپۋتات امانجول ءالتاي ماجىلىستە كولىك ءمينيسترى مارات قارابايەۆتان "سەرگەكتەن" تۇسەتىن ميللياردتاردىڭ ەسەبىن سۇرادى،- دەپ حابارلايدى Dalanews.kz Ulysmedia.kz-كە سىلتەپ.
ماجىلىستە كولىك ءمينيسترى مارات قارابايەۆ جولداردىڭ، كولىك ينفراقۇرىلىمدارىنىڭ ماسەلەسى توڭىرەگىندە بايانداما جاساپ، دەپۋتاتتاردىڭ سۇراعىنا جاۋاپ بەرىپ جاتىر. تالقى بارىسىندا دەپۋتات امانجول ءالتاي سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى روستيسلاۆ كونياشكينكە "سەرگەك" كامەرالارىنان تۇسەتىن قاراجاتتىڭ قانشا بولىگى قايدا كەتىپ جاتقانىن سۇراعان.
– ايىپپۇلداردان تۇسكەن قاراجاتتىڭ ءبارى دە بيۋدجەتكە تۇسەدى. شارتتار ءار وڭىردە ءارتۇرلى. ءار وڭىردە مەملەكەتتىك-جەكەشەلىك ارىپتەستىكتىڭ قالاي ورناتىلعانىنا بايلانىستى. دەمەك، ول شارتتاردى اكىمدىكتەر كامەرالاردى ورناتىپ، ينۆەستيسيانى قايتارۋ، وپەراسيالىق شىعىنداردى وتەۋ بويىنشا كونكۋرس نەگىزىندە جاساعان. ءبىز قوسىمشا اقپاراتتى بەرەمىز، – دەيدى كونياشكين.
ءالتاي ءبىراق ۆيسە-مينيستردىڭ بۇل جاۋابىنا قاناعاتتانعان جوق.”قاراجاتتىڭ قانشا پايىزى قازىناعا، قانشا پايىزى جەكە كومپانيا تۇسەدى؟ ايتساڭىزشى” دەپ سۇراعىن ناقتىلاعان.
– تاعى دا ايتايىن. ءار وڭىردە پايىز ءارتۇرلى. ءاۋ باستا بۇكىل ايىپپۇلداردىڭ قاراجاتى بيۋدجەتكە تۇسەدى. وسىدان كەيىن بيۋدجەتتەن ينۆەستيسيا مەن وپەراسيالىق شىعىندار وتەلەدى. ءار وڭىردە ءمجا ءارتۇرلى شارتتارمەن جاسالعان، – دەپ جاۋابىن قايتاردى.
امانجول ءالتاي ءبىراق ءبارىبىر ايتقانىنان قايتقان جوق. استانا قالاسىندا قانشا قاراجات قازىناعا “سەرگەك” كامەرالارىنان تۇسەتىنىن سۇراعان. ۆيسە-مينيستر تاعى ناقتى ايتا المادى.
