Májiliste kólik mınıstri Marat Qarabaev joldardyń, kólik ınfraqurylymdarynyń máselesi tóńireginde baıandama jasap, depýtattardyń suraǵyna jaýap berip jatyr. Talqy barysynda depýtat Amanjol Áltaı sıfrlyq damý, ınovasıalar jáne aeroǵarysh ónerkásibi vıse-mınıstri Rostıslav Konáshkınke "Sergek" kameralarynan túsetin qarajattyń qansha bóligi qaıda ketip jatqanyn suraǵan. 

– Aıyppuldardan túsken qarajattyń bári de búdjetke túsedi. Sharttar ár óńirde ártúrli. Ár óńirde memlekettik-jekeshelik áriptestiktiń qalaı ornatylǵanyna baılanysty. Demek, ol sharttardy ákimdikter kameralardy ornatyp, ınvestısıany qaıtarý, operasıalyq shyǵyndardy óteý boıynsha konkýrs negizinde jasaǵan. Biz qosymsha aqparatty beremiz, – deıdi Konáshkın.

Áltaı biraq vıse-mınıstrdiń bul jaýabyna qanaǵattanǵan joq.”Qarajattyń qansha paıyzy qazynaǵa, qansha paıyzy jeke kompanıa túsedi? Aıtsańyzshy” dep suraǵyn naqtylaǵan.

– Taǵy da aıtaıyn. Ár óńirde paıyz ártúrli. Áý basta búkil aıyppuldardyń qarajaty búdjetke túsedi. Osydan keıin búdjetten ınvestısıa men operasıalyq shyǵyndar óteledi. Ár óńirde MJÁ ártúrli sharttarmen jasalǵan, – dep jaýabyn qaıtardy.

Amanjol Áltaı biraq báribir aıtqanynan qaıtqan joq. Astana qalasynda qansha qarajat qazynaǵa “Sergek” kameralarynan túsetinin suraǵan. Vıse-mınıstr taǵy naqty aıta almady.