2030 jylǵa qarai Almatyda qoǵamdyq kólikpen táýligine qatynaý sanyn 2,3 mln-ǵa deiin jetkizý josparlanyp otyr. Bul bastapqy kórsetkishten shamamen 64%-ǵa joǵary. Atalǵan maqsatty kórsetkishter qalanyń Bas josparyn túzetý kezinde de saqtalady. Bul týraly «Almatybasjospar» ǴZI basshysy Ashat Sádýov máslihat depýtaty Sadir Hamraevtyń Almatynyń kólik júiesin damytý jónindegi suraǵyna jaýap berý barysynda aitty, dep habarlaidy dalanews.kz.
Ashat Sádýovtyń aitýynsha, negizgi mindetterdiń biri qoǵamdyq kólikti turǵyndar úshin barynsha qolaily etý. Bul jeke avtokólikti paidalaný qajettiligin azaityp, jolǵa ketetin ýaqytty qysqartýǵa múmkindik beredi.
Osy maqsatta aýdandar arasyndaǵy baǵytty damytý, qolaily kólik aýystyryp miný toraptaryn uiymdastyrý jáne qala ishinde ár joly ortalyq arqyly ótpei-aq qatynaýǵa múmkindik beretin kólik bailanystaryn qalyptastyrý kózdelgen.
2040 jylǵa qarai Bas josparda jeke avtokólikti paidalaný deńgeiin bastapqy kórsetkishpen salystyrǵanda shamamen 20%-ǵa tómendetý qarastyrylǵan.
Sonymen qatar qoǵamdyq kólik jelileriniń jalpy uzyndyǵyn qazirgi 981 shaqyrymnan 2030 jylǵa qarai 1 040 shaqyrymǵa, al 2040 jylǵa qarai 1 214 shaqyrymǵa deiin ulǵaitý josparlanyp otyr.
Budan bólek, jumys oryndary men kúndelikti qajetti qyzmetterdi turǵyn aýdandarǵa jaqyndatý úshin bes poliortalyqty damytý kózdelgen. Bul qala ishinde alys qashyqtyqqa qatynaý qajettiligin azaitýǵa múmkindik beredi.
Halyq sanynyń boljamy naqtylanǵan saiyn jolaýshylar tasymalyna degen qajettilik te qaita esepteledi.
Kólik júiesin damytý nátijeleri jolǵa ketetin ýaqyt, qoǵamdyq kóliktiń qozǵalys jyldamdyǵy jáne aýdandar arasyndaǵy qatynaýdyń qolailylyǵy sekildi kórsetkishter boiynsha baǵalanady.
