Almaty máslihatynyń kezekten tys sessiiasynda qala ákiminiń orynbasary Beibit Shahanov keshendi qala qurylysy saraptamasynyń oń qorytyndysyn alǵan 2040 jylǵa deiingi Bas jospardy túzetý jobasynyń negizgi erejeleri týraly baiandady, dep habarlaidy dalanews.kz.
Ol Bas jospardy túzetý jumystarynyń mańyzdy baǵyttarynyń biri qala turǵyndarymen ózara is-qimyl bolǵanyn atap ótti. Beibit Shahanovtyń aitýynsha, qoǵamdyq talqylaýlar barysynda kelip túsken usynystar men ótinishter saralanyp, zańnama talaptary men qala qurylysy shekteýleri eskerile otyryp, múmkindiginshe jobalyq sheshimderge engizilgen. Sonymen qatar strategiialyq ekologiialyq baǵalaýǵa jáne Bas jospardyń iske asyrylýyna odan ári qoǵamdyq baqylaý júrgizýge erekshe nazar aýdaryldy.
«Bas jospardy odan ári iske asyrýdyń mańyzy erekshe. Qujatty bekitý qalanyń keiingi damýyna negiz bolady, alaida onda kózdelgen sheshimderdi dáiekti túrde júzege asyrý negizgi kezeń bolmaq. Osyǵan bailanysty Bas jospardyń iske asyrylýyna, qurylys parametrleriniń saqtalýyna, áleýmettik jáne injenerlik infraqurylymnyń ýaqytyly damýyna, sondai-aq jasyl jelek pen tabiǵi aýmaqtardyń saqtalýyna turaqty monitoring júrgizýdi qamtamasyz etý qajet. Halyqpen bailanys ornatý jáne turǵyndardy negizgi jobalardyń iske asyrylý barysy týraly habardar etý de mańyzdy baǵyt bolyp qala beredi. Bul qala qurylysy sheshimderiniń ashyqtyǵyn arttyrýǵa jáne demografiialyq, kólik, ekologiialyq ári áleýmettik ahýaldaǵy ózgeristi der kezinde eskerýge múmkindik beredi», – dedi Beibit Shahanov.
Onyń aitýynsha, jańartylǵan qujat sońǵy derekterge negizdelgen jáne ekologiialyq, seismikalyq, kólik, áleýmettik jáne infraqurylymdyq shekteýlerdi eskere otyryp, qalanyń teńgerimdi damýyn qamtamasyz etýge baǵyttalǵan.
«Qalanyń aldynda Almatynyń tabiǵi áleýetin saqtaý, jaily qalalyq ortany qamtamasyz etý, kólik bailanysyn jaqsartý, halyq sanynyń ósýine qajetti jaǵdai jasaý jáne sonymen qatar qalanyń tarihi biregeiligin saqtaý mindeti tur», – dedi Almaty ákiminiń orynbasary.
