ق ر دەنساۋلىق ساقتاۋ ءمينيسترى اقمارال ءالنازاروۆا شىعىس قازاقستان وبلىسىنا جۇمىس ساپارىمەن كەلدى. ول وڭىردەگى مەديسينالىق نىسانداردى ارالاپ، بولاشاق مامانداردى دايىندايتىن وقۋ ورىندارىنىڭ جۇمىسىمەن تانىستى، حابارلايدى Dalanews.kz
سونىمەن قاتار ەلىمىزدە بالاماسى جوق گەماتولوگيالىق ورتالىقتىڭ قۇرىلىس بارىسىن باعالادى.
وسكەمەندەگى مەديسينالىق كوللەدجدە مينيستر وقۋ كابينەتتەرىن، پراكتيكالىق دايىندىققا ارنالعان قۇرال-جابدىقتاردى قاراپ شىقتى. وقىتۋشىلار جانە ستۋدەنتتەرمەن كەزدەسۋدە اقمارال ءالنازاروۆا مەديسينا بىلىمىندە بولاتىن الداعى وزگەرىستەرگە توقتالدى. كەزدەسۋدە وقۋ باعدارلامالارىن جاڭارتۋ، تاجىريبەگە نەگىزدەلگەن وقىتۋدى كۇشەيتۋ ماسەلەلەرى ءسوز بولدى. سونداي-اق تۇلەكتەردى جۇمىسقا ورنالاستىرۋ، وڭىردەگى مەديسينالىق مەكەمەلەرمەن ءوزارا ءىس-قيمىل جانە ءبىلىم بەرۋ پروسەسىن جەتىلدىرۋ ۇسىنىستارى تالقىلاندى. ستۋدەنتتەر ينتەرناتۋرادان ءوتۋ جاعدايلارىن جاقسارتۋ مەن جاس مامانداردىڭ جالاقىسى تۋرالى سۇراقتار قويدى.
وسكەمەن قالالىق №2 ەمحاناسىندا مينيستر العاشقى مەديسينالىق-سانيتارلىق كومەك كورسەتۋ ساپاسىمەن تانىسىپ، جالپى پراكتيكا دارىگەرلەرىنىڭ كابينەتتەرىن ارالادى. پاسيەنتتەرمەن جانە مەديسينا قىزمەتكەرلەرىمەن تىلدەسىپ، العاشقى مەديسينالىق بۋىننىڭ ماڭىزدىلىعىن اتاپ ءوتتى.
قۇرىلىس ءجۇرىپ جاتقان گەماتولوگيالىق ورتالىققا بارعان اقمارال ءالنازاروۆا جوبانىڭ بىرەگەيلىگى مەن اۋقىمىن ەرەكشە اتاپ ءوتتى. بۇل نىسان قان اۋرۋلارىن انىقتاۋ مەن ەمدەۋدىڭ مۇمكىندىكتەرىن وڭىردە عانا ەمەس، بۇكىل ەل بويىنشا كەڭەيتەدى. قۇرىلىس الاڭىندا دەنساۋلىق ساقتاۋ ءمينيسترى مەن شقو اكىمى نۇرىمبەت ساقتاعانوۆ جوبانىڭ نەگىزگى پارامەترلەرىن تالقىلادى.
– مينيسترلىك ءوز مىندەتتەمەلەرىن تولىق ورىندادى: قارجىلاندىرۋ كولەمى قاجەتتى دەڭگەيگە جەتكىزىلدى، ارنايى مەملەكەتتىك قور ەسەبىنەن قاراجات ءبولىندى. ەندىگى مىندەت – مەردىگەر كومپانيانىڭ قۇرىلىس جۇمىستارىن ۋاقىتىندا اياقتاۋى، – دەدى مينيستر.
جاڭا جوعارى تەحنولوگيالى گەماتولوگيالىق ورتالىق بىرنەشە كورپۋستان تۇرىپ، ءتۇرلى باعىتتا قىزمەت كورسەتەتىن بولادى. نىسان ىسكە قوسىلعان سوڭ وڭىردە عانا ەمەس، رەسپۋبليكا بويىنشا مەديسينالىق كومەكتىڭ ساپاسى ەداۋىر ارتادى.
– بۇل ورتالىق ءوڭىردىڭ مەديسينالىق ينفراقۇرىلىمىنىڭ ماڭىزدى بولىگىنە اينالادى. ەندى تۇرعىندار ارنايى، جوعارى بىلىكتى كومەكتى الۋ ءۇشىن ەلورداعا نەمەسە ءىرى قالالارعا بارۋعا ءماجبۇر بولمايدى. قۇرىلىس بارىسى – مەنىڭ جەكە باقىلاۋىمدا، – دەدى وبلىس اكىمى.
