بۇدان بۇرىن ورتالىق كوممۋنيكاسيالار قىزمەتىندە وتكەن بريفينگىدە شقو اكىمى دانيال احمەتوۆ ايماقتىڭ ءبىلىم سالاسىن دامىتۋعا باسىمدىق بەرىلەتىنىن ايتقان. 

ايماق باسشىسى بۇل رەتتە مەكتەپتەردەگى ورىن جەتىسپەۋشىلىك ماسەلەسىنە نازار اۋدارعان بولاتىن.

 

"وڭىردە جاڭا ءبىلىم وردالارى سالىنىپ، وقۋشىلاردىڭ كەڭ بولمەلەردە ءبىلىم الۋىن قامتاماسىز ەتەمىز" دەگەن ەدى دانيال احمەتوۆ.

ال بۇگىن وسكەمەندەگى م.شاياحمەتوۆ اتىنداعى №23 مەكتەپكە جاپسارلاس 300 ورىندىق قوسىمشا كورپۋس سالىندى.

قۇرىلىسى 2017 جىلى باستالعان كورپۋستا جالپى وقۋ جانە مامانداندىرىلعان كابينەتتەر، كىتاپحانا، اسحانا جانە سپورت زالى، مەديسينالىق كابينەت بار.

سونىمەن قاتار كورپۋستىڭ اينالاسىنا اباتتاندىرۋ جۇمىستارى جۇرگىزىلەدى. مەكتەپ اۋماعىنىڭ قورشاۋى جاڭارتىلىپ، سپورت الاڭدارى مەن بالالاردىڭ ويىن الاڭقايلارى سالىندى، جاياۋ جۇرگىنشىلەر جولى جاسالدى، جارىقتاندىرىلدى.



عيماراتتىڭ قۇرىلىسى مەن اباتتاندىرۋ جۇمىستارىنا ساپالى ماتەريالدار قولدانىلىپ، كورپۋس بەينەباقىلاۋ جۇيەسىمەن، زاماناۋي جابدىقتارمەن قامتاماسىز ەتىلدى.

قوسىمشا كورپۋس زاماناۋي وقىتۋ قۇرالدارىن قولدانا وتىرىپ بالالاردىڭ ءبىلىم الۋىنا قولايلى جاعداي جاساۋعا، وقۋشىلاردىڭ بوس ۋاقىتىن ءتيىمدى وتكىزۋگە مۇمكىندىك بەرەدى.