بۇل جايىندا ايماقتىڭ 2025 جىلعا دەيىنگى قۇرىلىس جوسپارىن ىسكە اسىرۋدى تالقىلاعان جيىندا ءوڭىر باسشىسى دانيال احمەتوۆ ءمالىم ەتتى.
اكىمنىڭ اقپاراتىنا ساي قازىرگى تاڭدا 170-كە جۋىق ءتۇرعىن-ۇيدىڭ جوبالىق-سمەتالىق قۇجاتتاماسى ازىرلەنۋ ۇستىندە. بۇل شامامەن – 650 مىڭ شارشى مەتردەن استام تۇرعىن ءۇي.
"بيىلعى جىلى وبلىستاعى قۇرىلىس قارقىنى تاۋەلسىزدىك تاريحىندا العاش رەت ميلليون شارشى مەتردەن اسىپ جىعىلدى. بۇل اۋىز تولتىرىپ ايتۋعا تۇرارلىق جەتىستىك. اسىرەسە، سەمەي قالاسىنا قۇمبىل كوڭىل بولۋدەمىز. بۇل شەشىم ءوزىن-وزى اقتادى.
قۇرىلىس جۇمىستارىنىڭ قارقىنى بويىنشا بيىلعى جىلى سەمەي قالاسى وسكەمەندى ارتتا قالدىردى. الايدا مۇنىمەن توقتاپ قالۋعا بولمايدى، ءوزى ءجۇرىستان جاڭىلماي، الداعى جىلدارعا جۇيەلى جوسپار قۇرۋ قاجەت»، - دەدى دانيال احمەتوۆ.
اكىمنىڭ ايتۋىنشا، «ءبىرقاباتتى شىعىس» جوباسى اياسىندا كوممەرسيالىق جانە نەسيەلىك ۇيلەر كوپتەپ سالىنۋدا. تۇرعىندار اراسىندا ول ۇيلەرگە سۇرانىس جوعارى.
«الداعى جىلى ءبىرىنشى بولىپ قارجىلاندىرۋدى بيىل جاقسى ناتيجە كورسەتكەن اۋداندار الاتىنىن اتاپ وتكىم كەلەدى. سونداي-اق ەلىمىزدىڭ باسقا قالالارى مەن وبلىستارىنداعى قۇرىلىس كومپانيالارىن قايتا تارتۋعا دايىنبىز. الەۋمەتتىك جانە مادەني وبەكتىلەر سالۋدى جوسپارلاۋ، ونىڭ ىشىندە بارلىق قاجەتتى ينجەنەرلىك كوممۋنيكاسيالاردى جۇرگىزۋگە 2023 جىلى قوسىمشا قانشا قارجى قاجەت ەكەنىن ەسەپتەۋ كەرەك. وسى قارقىندى باسەڭدەتپەي، 2022-2025 جىلدار ارالىعىندا جىل سايىن كەمىنە 700 مىڭ شارشى مەتر تۇرعىن ءۇي سالۋ كوزدەلىپ وتىر»، - دەدى دانيال احمەتوۆ.
