سىزدەردىڭ سپورتتىق جەتىستىكتەرىڭىزدى ەل پرەزيدەنتى جوعارى باعالاپ، مەملەكەتتىك ناگرادا بەردى. زۋلفيا ءىى دارەجەلى "دوستىق"، يگور – "قۇرمەت" وردەندەرىمەن ماراپاتتالدى. وليمپيادا ويىندارىنىڭ قولا جۇلدەسى ەلىمىز ءۇشىن ۇلكەن جەتىستىك. سوندىقتان سەندەر ءبىزدىڭ ەلىمىزدىڭ ماقتانىشىسىزدار. سىزدەرگە بارلىق قاجەتتى مەملەكەتتىك قولداۋ تۇراقتى تۇردە كورسەتىلەدى. ءبىز ءوز تاراپىمىزدان كومەكتەسۋدى جانە قولداۋدى جالعاستىرامىز. بۇگىن مەن سىزدەردى جەتىسۋلىقتار اتىنان ەلەۋلى جەڭىسپەن قۇتتىقتايمىن جانە جاڭا سپورت شىڭدارىن باعىندىرۋلارىڭىزعا تىلەكتەسپىن، - دەگەن اماندىق باتالوۆ سپورتشىلارعا وبلىس اكىمىنىڭ قۇرمەت گراموتاسى جانە پاتەر كىلتتەرىن تابىس ەتتى.
زۋلفيا چينشانلو ءۇش بولمەلى پاتەردىڭ، ال يگور سون ەكى بولمەلى پاتەردىڭ كىلتىن الدى. سپورتشىلاردىڭ جاتتىقتىرۋشىلارى دا ماراپاتتالدى. ولارعا ءارقايسىسىنا 2 ميلليون تەڭگەدەن اقشا سەرتيفيكاتتارى تابىس ەتىلدى.
وليمپيادا ويىندارىنىڭ قولا جۇلدەگەرى، اۋىر اتلەتيكادان 2019 جىلعى الەم چەمپيوناتىنىڭ كۇمىس جۇلدەگەرى يگور سون سپورتشىلارعا كورسەتكەن كومەگى مەن قولداۋى ءۇشىن العىسىن ءبىلدىردى:
سپورتشىلارعا بارلىق جاعىنان كورسەتكەن كومەگى ءۇشىن ەل پرەزيدەنتىنە شىنايى ريزاشىلىعىمدى بىلدىرەمىن. ءبىز ءوز تاراپىمىزدان بىزگە ارتىلعان سەنىمدى اقتاۋعا بار كۇشىمىزدى سالامىز. الدا ازيا ويىندارى. ءبىز ولارعا جوعارى ماراپاتتارعا يە بولۋ ءۇشىن بەلسەندى تۇردە دايىندالاتىن بولامىز، - دەدى ول.
ق ر ەڭبەك سىڭىرگەن سپورت شەبەرى، حالىقارالىق دارەجەدەگى سپورت شەبەرى، يگور سوننىڭ جاتتىقتىرۋشىسى ۆلاديمير سەدوۆ تا ريزاشىلىعىن ءبىلدىردى:
13 جىل بويى مەن سپورت ينتەرناتىندا جاتتىقتىرۋشى بولىپ جۇمىس ىستەپ كەلەمىن. ەندى وليمپيادا ويىندارىنىڭ قولا جۇلدەگەرى اتانعان تاعى ەكى تاربيەلەنۋشىم بار. ءبىرىنشىسى - كارينا گوريچيەۆا، ءقازىر يگور. مەن بۇعان وتە قۋانىشتىمىن. جاتتىقتىرۋشىلار اتىنان سپورتشىلارىمىزدىڭ ءساتتى جاتتىقتىرۋى ءۇشىن جاسالعان جاعدايعا العىس ايتقىم كەلەدى. ءبىز ەلگە جانە ايماققا مەدال اكەلۋ ءۇشىن ناتيجە ءۇشىن جۇمىستى جالعاستىرامىز، - دەدى ول.
كەزدەسۋ بارىسىندا سپورتشىلار الداعى جوسپارلارىمەن ءبولىستى، وزدەرىنىڭ ماقساتتارى مەن سپورتتىق دايىندىق ەرەكشەلىكتەرى تۋرالى ايتتى.
اماندىق باتالوۆ اتاپ وتكەندەي، الماتى وبلىسى چەمپيونداردىڭ تۇتاس گالاكتيكاسىن تاربيەلەپ شىعاردى، بۇل مەملەكەتتىڭ جان-جاقتى قولداۋىنىڭ ارقاسىندا مۇمكىن بولدى.
ءبىز جاقىندا ورتالىق ازيادا بالاماسى جوق وليمپيادالىق باسسەيندى پايدالانۋعا بەردىك. ءقازىردىڭ وزىندە وعان 850-گە جۋىق بالا جۇزۋگە جازىلدى. بولاشاقتا ولاردىڭ كوپشىلىگى ءبىزدى جەتىستىكتەرى مەن جەڭىستەرىمەن قۋانتادى دەپ ويلايمىن. ەلباسىنىڭ رەسپۋبليكادا 100 سپورتتىق-ساۋىقتىرۋ ورتالىعىنىڭ قۇرىلىسىنا تاپسىرىسىنا سايكەس، وبلىستا 13 سپورتتىق-ساۋىقتىرۋ ورتالىعى پايدالانۋعا بەرىلدى. تاعى 5-ەۋى جاقىندا بەرىلەدى. ولاردىڭ بىرەۋى شالعايداعى بالقاش وڭىرىندە. ءقازىردىڭ وزىندە پايدالانۋعا دايىن. بۇل رەتتە ءبىز سپورت عيماراتتارىن، ماتەريالدىق-تەحنيكالىق بازانى رەتتەۋگە ەرەكشە نازار اۋدارامىز. بۇنىڭ ءبارى بۇقارالىق سپورتتى دامىتۋعا جانە جاڭا تالانتتاردى انىقتاۋعا ىقپال ەتىپ، ناتيجە بەرۋدە. مەن سىزدەردى تاعى جارقىن جەڭىستەرىڭمەن قۇتتىقتايمىن. سىزدەرگە ساتتىلىك تىلەيمىن، - دەپ قورىتىندىلادى كەزدەسۋدى وبلىس اكىمى اماندىق باتالوۆ.
