جاقىندا جۇرگىزىلگەن زەرتتەۋگە قاتىسقان قازاقستاندىق كومپانيالاردىڭ 85%-ى ءقازىردىڭ وزىندە جاساندى ينتەللەكت (جي) ماماندارىنا سۇرانىس بار ەكەنىن اتاپ ءوتتى. رەسپوندەنتتەردىڭ 96%-ى مۇنداي قاجەتتىلىك الداعى 2–3 جىلدا مىندەتتى تۇردە تۋىندايتىنىنا سەنىمدى، دەپ حابارلايدى Dalanews.kz.
بۇل زەرتتەۋدى Qazaq Expert Club-تىڭ HR سالاسىنداعى ساراپشىسى ارمان شوقپاروۆ باستاماشىلىق ەتتى. ول جي قۇرالدارىن بيزنەس-پروسەستەرگە ەنگىزۋ قاجەتتىلىگىن انىقتاۋ ماقساتىندا ءتۇرلى كومپانيالاردىڭ 78 وكىلىن زەرتتەۋگە تارتقان.
"جي ءبىزدى الماستىرا ما؟" دەگەن سۇراق بىلتىردان بەرى ءجيى قويىلىپ ءجۇر. مەن وعان جاۋاپ تابۋ ءۇشىن ساۋالناما جۇرگىزدىم. رەسپوندەنتتەردىڭ 60%-ى - جەرگىلىكتى جەكە كومپانيالاردىڭ توپ-مەنەدجەرلەرى، 10%-ى - شەتەلدىك ۇيىمدار، ال 8%-ى - مەملەكەتتىك جانە كۆازيمەملەكەتتىك قۇرىلىم وكىلدەرى. سونىمەن قاتار، قاتىسۋشىلاردىڭ 70%-ى الماتىدا، 20%-ى استانادا جانە 10%-ى باسقا قالالاردا ورنالاسقان"، - دەيدى ارمان.
ونىڭ ايتۋىنشا، الدىڭعى قاتارلى ۇيىمداردا جي بارلىق دەرلىك پروسەستەردە قولدانىلادى: نەيروجەلىگە قاراپايىم سۇراۋ جىبەرۋدەن باستاپ، كومپيۋتەرلىك كورۋ تەحنولوگيالارى ارقىلى قىزمەتكەرلەرگە ءتونۋى مۇمكىن قاۋىپتەردى انىقتاۋعا دەيىن. سونىمەن قاتار، كومپانيا وكىلدەرىنىڭ ەشقايسىسى جي نەگىزىندەگى تەحنولوگيالاردى ەنگىزگەننەن كەيىن قىزمەتكەرلەردى قىسقارتۋ تۋرالى ايتپاعان.
زەرتتەۋ ناتيجەسىنە سايكەس، كومپانيالار ءجي-دى كەلەسى باعىتتاردا قولدانادى: رۋتينالىق پروسەستەردى اۆتوماتتاندىرۋ - 74%، ءماتىن وڭدەۋ - 65%، شەشىم قابىلداۋدى ينتەللەكتۋالدى قولداۋ — 55%، دىبىس وڭدەۋ - 44%، ۆيزۋالدى دەرەكتەردى وڭدەۋ - 40% جانە ت.ب.
ال جاقىن بولاشاقتا ساۋالناماعا قاتىسۋشىلار ءجي-دى مىنا باعىتتاردا كوبىرەك ينتەگراسيالاۋدى جوسپارلاپ وتىر: باعدارلامالىق جاساقتاما ازىرلەۋ - 70%، ماركەتينگ جانە ساتۋ - 52%، HR - 49%، قارجى جانە بۋحگالتەريا - 39% جانە ت.ب.
ساراپشىنىڭ ايتۋىنشا، رەسپوندەنتتەردىڭ باسىم بولىگى بيزنەس ءجي-دى دجۋنداردىڭ (جاس مامانداردىڭ) مىندەتتەرىن ورىنداۋ ءۇشىن پايدالانىپ وتىرعانىن ايتقان. سوندىقتان كومپانيالار ولاردىڭ قىزمەتىنە بۇرىنعىداي مۇقتاج ەمەس، كەرىسىنشە تاجىريبەلى مامانداردى ىزدەۋگە كوبىرەك كوڭىل بولۋدە. ساراپشىلاردىڭ بولجامىنشا، جي باعىتىنداعى كلاسسيكالىق دجۋندار سانى نارىقتا ازايادى: ولار جوعارى وقۋ ورىندارىندا نەمەسە ءبىلىم بەرۋ جۇيەسىندە ۇزاعىراق وقىپ، ەڭبەك نارىعىنا تاجىريبەلىك تۇرعىدا جاقسىراق دايىندىقپەن شىعاتىن بولادى.
سونداي-اق كومپانيالاردىڭ 38%-ى قىزمەتكەرلەرىن ىشكى رەسۋرستار ارقىلى وقىتادى، ال تەك 22%-ى ءۇشىنشى تاراپ ماماندارىن تارتادى. رەسپوندەنتتەردىڭ 26%-ى قىزمەتكەرلەر نەيروجەلىلەردى ءوز بەتىنشە مەڭگەرۋى ءتيىس ەكەنىن ايتقان. دەگەنمەن، 45% كومپانيا جي داعدىلارى بار مامانداردى بەلسەندى تۇردە ىزدەپ، جۇمىسقا قابىلداپ جاتقانىن مالىمدەگەن.
"ساۋالناماعا قاتىسقانداردىڭ 11%-ى بيىل 20-دان استام جي مامانىن جۇمىسقا الادى، 19%-ى 10-نان 20-عا دەيىن ادامدى قابىلدايدى، 40%-ى 10-نان از جي-تالانتقا جۇمىس ۇسىنۋعا دايىن، ال قالعاندارى ازىرگە ناقتى قادام جاساعان جوق. الايدا بۇل - ۋاقىت ماسەلەسى عانا، شامامەن 1–2 جىل"، - دەپ تۇيىندەدى ارمان.
