Jaqynda júrgizilgen zertteýge qatysqan qazaqstandyq kompaniialardyń 85%-y qazirdiń ózinde jasandy intellekt (JI) mamandaryna suranys bar ekenin atap ótti. Respondentterdiń 96%-y mundai qajettilik aldaǵy 2–3 jylda mindetti túrde týyndaitynyna senimdi, dep habarlaidy Dalanews.kz.
Bul zertteýdi Qazaq Expert Club-tyń HR salasyndaǵy sarapshysy Arman Shoqparov bastamashylyq etti. Ol JI quraldaryn biznes-protsesterge engizý qajettiligin anyqtaý maqsatynda túrli kompaniialardyń 78 ókilin zertteýge tartqan.
"JI bizdi almastyra ma?" degen suraq byltyrdan beri jii qoiylyp júr. Men oǵan jaýap tabý úshin saýalnama júrgizdim. Respondentterdiń 60%-y - jergilikti jeke kompaniialardyń top-menedjerleri, 10%-y - sheteldik uiymdar, al 8%-y - memlekettik jáne kvazimemlekettik qurylym ókilderi. Sonymen qatar, qatysýshylardyń 70%-y Almatyda, 20%-y Astanada jáne 10%-y basqa qalalarda ornalasqan", - deidi Arman.
Onyń aitýynsha, aldyńǵy qatarly uiymdarda JI barlyq derlik protsesterde qoldanylady: neirojelige qarapaiym suraý jiberýden bastap, kompiýterlik kórý tehnologiialary arqyly qyzmetkerlerge tónýi múmkin qaýipterdi anyqtaýǵa deiin. Sonymen qatar, kompaniia ókilderiniń eshqaisysy JI negizindegi tehnologiialardy engizgennen keiin qyzmetkerlerdi qysqartý týraly aitpaǵan.
Zertteý nátijesine sáikes, kompaniialar JI-di kelesi baǵyttarda qoldanady: rýtinalyq protsesterdi avtomattandyrý - 74%, mátin óńdeý - 65%, sheshim qabyldaýdy intellektýaldy qoldaý — 55%, dybys óńdeý - 44%, vizýaldy derekterdi óńdeý - 40% jáne t.b.
Al jaqyn bolashaqta saýalnamaǵa qatysýshylar JI-di myna baǵyttarda kóbirek integratsiialaýdy josparlap otyr: baǵdarlamalyq jasaqtama ázirleý - 70%, marketing jáne satý - 52%, HR - 49%, qarjy jáne býhgalteriia - 39% jáne t.b.
Sarapshynyń aitýynsha, respondentterdiń basym bóligi biznes JI-di djýndardyń (jas mamandardyń) mindetterin oryndaý úshin paidalanyp otyrǵanyn aitqan. Sondyqtan kompaniialar olardyń qyzmetine burynǵydai muqtaj emes, kerisinshe tájiribeli mamandardy izdeýge kóbirek kóńil bólýde. Sarapshylardyń boljamynsha, JI baǵytyndaǵy klassikalyq djýndar sany naryqta azaiady: olar joǵary oqý oryndarynda nemese bilim berý júiesinde uzaǵyraq oqyp, eńbek naryǵyna tájiribelik turǵyda jaqsyraq daiyndyqpen shyǵatyn bolady.
Sondai-aq kompaniialardyń 38%-y qyzmetkerlerin ishki resýrstar arqyly oqytady, al tek 22%-y úshinshi tarap mamandaryn tartady. Respondentterdiń 26%-y qyzmetkerler neirojelilerdi óz betinshe meńgerýi tiis ekenin aitqan. Degenmen, 45% kompaniia JI daǵdylary bar mamandardy belsendi túrde izdep, jumysqa qabyldap jatqanyn málimdegen.
"Saýalnamaǵa qatysqandardyń 11%-y biyl 20-dan astam JI mamanyn jumysqa alady, 19%-y 10-nan 20-ǵa deiin adamdy qabyldaidy, 40%-y 10-nan az JI-talantqa jumys usynýǵa daiyn, al qalǵandary ázirge naqty qadam jasaǵan joq. Alaida bul - ýaqyt máselesi ǵana, shamamen 1–2 jyl", - dep túiindedi Arman.
