قازاقستان قور بيرجاسىندا (KASE) 6 مامىردا ساعات 11:00-دە تەڭگەگە شاققانداعى 1 اقش دوللارىنىڭ  تىركەلگەن ورتاشا باعامى 514،75 تەڭگەنى قۇرادى. وسىلايشا اپتا باسىندا قايتا السىرەي باستاعان ۇلتتىق ۆاليۋتامىز قايتادان 3،78 تەڭگەگە قىمباتتاي ءتۇستى، دەپ حابارلايدى Dalanews.kz.

كەشە عانا ۇلتتىق بانكتىڭ تاڭەرتەڭ بەكىتكەن 1 اقش دوللارىنىڭ رەسمي باعامى  516،16 تەڭگە بولعان. ال كەشكە قاراي الەمدىك مۇناي نارىعىنداعى باعانىڭ قۇلدىراۋىنا بايلانىستى دوللار كۇش الىپ، باعامى 518،7 تەڭگەنى قۇراعان. ساراپشىلار دا مۇناي قۇنسىزدانسا، تەڭگە دە قۇنسىزدانا بەرەتىنىن جارىسا ايتقان ەدى. الايدا قور بيرجاسىنداعى بۇگىنگى كۇندىزگى جاعداي باسقاشا سيپاتتا.

نەگىزى، الەمدىك نارىقتا Brent ماركالى مۇنايى ءالى قۇنسىزدانۋدا. كەشەگى ءبىر باررەلدىڭ باعاسى 59 دوللار بولسا، بۇگىنگى باعا - 58 دوللار.

الماتىداعى اقشا ايىرباس ورىندارىندا 6 مامىردا 1 اقش دوللارى 514 تەڭگەدەن ساتىپ الىنىپ، 517 تەڭگەدەن ساتىلۋدا، ال 1 ەۆرو 583 تەڭگەدەن ساتىپ الىنىپ، 590 تەڭگەدەن ساتىلۋدا.

رەسەيلىك ميللياردەر ولەگ دەريپاسكا مۇنايدىڭ ءبىر باررەلى 45 دوللارعا دەيىن تومەندەۋى ىقتيمال ەكەنىن بولجايدى. مۇندايدا بيلىك شەتەلدىك ۆاليۋتامەن ۇلتتىق قورعا كەلىپ تۇسەتىن ازايعان ءتۇسىمدى كىشكەنە بولسىن ارتتىرۋ ءۇشىن دوللاردى قىمباتتاتۋعا كوشەتىنى بەلگىلى. وسى جاعىنان العاندا، امەريكالىق ۆاليۋتانى ساتىپ الۋعا ءقازىر قولايلى كەزەڭ سەكىلدى.

بۇعان دەيىن سايتىمىزدا مامىر ايىنىڭ سوڭىنا قاراي تەڭگەگە شاققاندا 1 اقش دوللارىنىڭ باعامى قانشا بولاتىنىن جازعانبىز. بۇل تۋرالى Halyk Finance ءوز بولجامىن جاريالادى.