كوپىر قۇرىلىسى 2024 جىلدىڭ اياعىندا ءتامامدالىپ، شقو تۇرعىندارىنىڭ يگىلىگىنە بەرىلەدى. قۇرىلىسقا جاۋاپتى "شىعىس جول" جشس-ى كوپىر سالىپ ابدەن ماشىقتانعان، تاجىريبەسى مول كومپانيانىڭ ءبىرى.

جوبا قۇرىلىسى ءوز مارەسىنە جەتىپ، قولدانىسقا بەرىلگەن كۇنى شقو-داعى ءۇش بىردەي ءىرى اۋدان، اتاپ ايتساق - زايسان، كۇرشىم جانە تارباعاتاي اۋداندارىنىڭ ەكىنشى تىنىسى اشىلادى.

اۋدان تۇرعىندارى بۇرىنعىداي پارومعا تاۋەلدى بولمايدى، بۇقتىرمانى باسىپ وتۋگە اۋا رايى دا كەدەرگى كەلتىرە المايدى.

"شىعىس جول" كومپانياسى ديرەكتورىنىڭ ورىنباسارى نىعماتۋللا ءابدىلحاقوۆتىڭ ايتۋىنشا

كوپىر تاۋلىگىنە 20 مىڭ كولىكتى ەمىن-ەركىن وتكىزەتىن مۇمكىندىككە يە بولماق، مۇنىمەن قاتار ۇزىندىعى 20 شاقىرىمنان اسىپ جىعىلاتىن جولايىرىقتار دا سالىنىپ جاتقانى جايى بار.  

"تۇرعىندار كوپىر ارقىلى ەش كەدەرگىسىز قاتىنايدى. نىسان اۋا رايىنىڭ قولايسىزدىعى مەن ماۋسىمدىق وزگەرىستەرگە توتەپ بەرەدى. قۇرىلىسقا ارنايى سىناقتان وتكەن ساپالى مەتالل مەن بەتوندى پايدالانۋ ۇستىندەمىز، كوپىردىڭ تىرەكتەرى 40 مەترگە دەيىنگى تەرەڭدىكتە ورنالاسقان، سوندىقتان الاڭداۋعا سەبەپ جوق"، – دەيدى كومپانيا وكىلى.

ءازىر مۇنداي بەتون دىڭگەكتەردىڭ 9-ى ورناتىلىپ قويعان، قۇرىلىس بارىسىندا بارلىعى 21 تىرەك ورناتىلادى. قۇرىلىس بۇقتىرمانىڭ قوس قاپتالىنان ءبىر مەزەتتە جۇرگىزىلىپ جاتىر، ايماق ءۇشىن ستراتەگيالىق نىسانداردىڭ ەسەبىنە ەنەتىن كوپىر ءتيىستى دەڭگەيدەگى كۇزەتپەن دە قامتاماسىز ەتىلەدى.

ەكى جولاقتى كوپىردىڭ ەنى، ىلگەرىدە ايتقانداي 10 مەتردى قۇرايدى. قار مەن جاڭبىر سۋىنىڭ جينالۋىنا جول بەرمەيتىن ارنايى كانالدار دا قاراستىرىلعان.

ءقازىر قۇرىلىس باسىندا 280 جۇمىسشى ءجۇر، كۇنى-تۇنى تىنباي، قىزۋ ءجۇرىپ جاتقان جۇمىستىڭ قارقىنى جوعارى. جۇمىسشىلاردىڭ باسىم كوپشىلىگى ىرگەدەگى اۋدان تۇرعىندارى. اۋقىمدى جوبا ۋاقىتشا بولسا دا جاڭا جۇمىس ورىندارىن قۇرۋعا جاردەمدەسكەن.

ەكى اۋىسىممەن جۇمىس ىستەيتىن قاۋىمنىڭ جاعدايىن ويلاعان قۇرىلىس كومپانياسى كوپىردىڭ بۇيىرىنەن ۆاگونداردان تۇراتىن ۆاحتالى اۋىل تۇرعىزىپتى.

كۇرشىم اۋدانىنا ات باسىن تىرەگەن ايماق باسشىسى دانيال احمەتوۆ قۇرىلىس باسىنا باسىپ، وسى ۋاقىتقا دەيىن اتقارىلعان جۇمىستىڭ جاي-جاپسارىمەن تانىسىپ قايتتى. 

اكىم كوپىر قۇرىلىسىنىڭ تيىمدىلىگىن ءسوز ەتىپ، اۋقىمدى جوبانىڭ ارقاسىندا ايماقتاعى الىس-بەرىس پەن بارىس-كەلىسكە جان بىتەتىنىن ايتتى. بۇل ءوز كەزەگىندە قىزمەت تۇرلەرى مەن تاۋار باعاسىنىڭ ارزانداۋىنا سەبەپكەر بولادى.

كوپىر ايماقتىڭ تۋريزمىنە وڭ ىقپال ەتىپ، كاسىپكەرلىك پەن ءوندىرىستىڭ دامۋىنا جول اشادى.

ال جەرگىلىكتى حالىقتىڭ قۋانىشىندا شەك جوق. وسى كۇنگە دەيىن وبلىس ورتالىعىنا قاتىناۋدان قيىندىق كورىپ كەلگەن زايسان، كۇرشىم جانە تارباعاتاي تۇرعىندارى كوپىردىڭ قولدانىسقا بەرىلەر ءساتىن تاعاتسىزدانا كۇتۋدە. كوپىر ىسكە قوسىلسا، اتالعان اۋداندارعا ءتۇرلى تاۋار تاسىمالدايتىن كاسىپكەرلەر دە باعانى تۇسىرۋگە ۋادە ەتكەن.

وسىناۋ جوبا مارقاكول مەن مارالدىنىڭ تۋريستىك پوتەنسيالىن جاڭا قىرىنان تانىتىپ، جاڭا جۇمىس ورىندارىن قۇرۋعا ۇيىتقى بولادى دەگەن سەنىمدەمىز.