Prezident Toqaevtyń tapsyrmasy boiynsha salyna bastaǵan kópirdiń uzyndyǵy 1300 metrdi qurap, eni 10 metrge deiin jetpek.
Kópir qurylysy 2024 jyldyń aiaǵynda támámdalyp, ShQO turǵyndarynyń igiligine beriledi. Qurylysqa jaýapty "Shyǵys Jol" JShS-y kópir salyp ábden mashyqtanǵan, tájiribesi mol kompaniianyń biri.
Joba qurylysy óz máresine jetip, qoldanysqa berilgen kúni ShQO-daǵy úsh birdei iri aýdan, atap aitsaq - Zaisan, Kúrshim jáne Tarbaǵatai aýdandarynyń ekinshi tynysy ashylady.
Aýdan turǵyndary burynǵydai paromǵa táýeldi bolmaidy, Buqtyrmany basyp ótýge aýa raiy da kedergi keltire almaidy.
"Shyǵys Jol" kompaniiasy direktorynyń orynbasary Nyǵmatýlla Ábdilhaqovtyń aitýynsha
kópir táýligine 20 myń kólikti emin-erkin ótkizetin múmkindikke ie bolmaq, munymen qatar uzyndyǵy 20 shaqyrymnan asyp jyǵylatyn jolaiyryqtar da salynyp jatqany jaiy bar.
"Turǵyndar kópir arqyly esh kedergisiz qatynaidy. Nysan aýa raiynyń qolaisyzdyǵy men maýsymdyq ózgeristerge tótep beredi. Qurylysqa arnaiy synaqtan ótken sapaly metall men betondy paidalaný ústindemiz, kópirdiń tirekteri 40 metrge deiingi tereńdikte ornalasqan, sondyqtan alańdaýǵa sebep joq", – deidi kompaniia ókili.
Ázir mundai beton dińgekterdiń 9-y ornatylyp qoiǵan, qurylys barysynda barlyǵy 21 tirek ornatylady. Qurylys Buqtyrmanyń qos qaptalynan bir mezette júrgizilip jatyr, aimaq úshin strategiialyq nysandardyń esebine enetin kópir tiisti deńgeidegi kúzetpen de qamtamasyz etiledi.
Eki jolaqty kópirdiń eni, ilgeride aitqandai 10 metrdi quraidy. Qar men jańbyr sýynyń jinalýyna jol bermeitin arnaiy kanaldar da qarastyrylǵan.
Qazir qurylys basynda 280 jumysshy júr, kúni-túni tynbai, qyzý júrip jatqan jumystyń qarqyny joǵary. Jumysshylardyń basym kópshiligi irgedegi aýdan turǵyndary. Aýqymdy joba ýaqytsha bolsa da jańa jumys oryndaryn qurýǵa járdemdesken.
Eki aýysymmen jumys isteitin qaýymnyń jaǵdaiyn oilaǵan qurylys kompaniiasy kópirdiń búiirinen vagondardan turatyn vahtaly aýyl turǵyzypty.
Kúrshim aýdanyna at basyn tiregen aimaq basshysy Danial Ahmetov qurylys basyna basyp, osy ýaqytqa deiin atqarylǵan jumystyń jai-japsarymen tanysyp qaitty.
Ákim kópir qurylysynyń tiimdiligin sóz etip, aýqymdy jobanyń arqasynda aimaqtaǵy alys-beris pen barys-keliske jan bitetinin aitty. Bul óz kezeginde qyzmet túrleri men taýar baǵasynyń arzandaýyna sebepker bolady.
Kópir aimaqtyń týrizmine oń yqpal etip, kásipkerlik pen óndiristiń damýyna jol ashady.
Al jergilikti halyqtyń qýanyshynda shek joq. Osy kúnge deiin oblys ortalyǵyna qatynaýdan qiyndyq kórip kelgen Zaisan, Kúrshim jáne Tarbaǵatai turǵyndary kópirdiń qoldanysqa beriler sátin taǵatsyzdana kútýde. Kópir iske qosylsa, atalǵan aýdandarǵa túrli taýar tasymaldaityn kásipkerler de baǵany túsirýge ýáde etken.
Osynaý joba Marqakól men Maraldynyń týristik potentsialyn jańa qyrynan tanytyp, jańa jumys oryndaryn qurýǵa uiytqy bolady degen senimdemiz.
