iPhone 15 Pro smartfonyna qatysty shaǵymnan keiin "Ksell" kompaniiasyna 2,1 million teńge aiyppul salyndy, dep habarlaidy dalanews.kz.
"Qostanai jańalyqtary" gazetiniń málimetinshe, Ákimshilik quqyq buzýshylyqtar jónindegi mamandandyrylǵan sot "Ksell" AQ-na qatysty isti ÁQBtK-niń 462-baby 3-bóligi boiynsha qaraǵan. Kompaniia memlekettik baqylaý organynyń zańdy talabyn tiisti deńgeide oryndamaǵan dep tanyldy.
Sot sheshimimen "Ksell" 2 mln 162 myń 500 teńge kóleminde aiyppul tóleýge mindetteldi. Bul — 500 ailyq eseptik kórsetkish. Alaida kompaniia qyzmetin toqtatý túrindegi qosymsha jaza qoldanylǵan joq.
Istiń qaralýyna Qostanai turǵynynyń shaǵymy sebep bolǵan. Ol 2025 jyldyń jeltoqsanynda óziniń iPhone 15 Pro smartfonynda aqaýlar baryn aityp júgingen. Tutynýshynyń sózinshe, telefon qýatty tez joǵaltqan, 85 paiyzdan artyq qýattalmaǵan jáne qatty qyzǵan.
Tekserý nátijesinde Qostanai oblystyq Tutynýshylar quqyǵyn qorǵaý departamenti kompaniiaǵa qurylǵyny aýystyrý nemese onyń aqshasyn qaitarý jóninde nusqama bergen. Bul talap 2026 jylǵy 6 aqpanǵa deiin oryndalýy tiis bolǵan.
Is materialdaryna sáikes, 4 aqpanda smartfon «Ksell» arqyly Apple servis ortalyǵyna jiberilgen. Diagnostika qorytyndysynda qurylǵydan tehnikalyq aqaý anyqtalmaǵany, tek baǵdarlamalyq qaita ornatý júrgizilgeni aitylǵan.
Alaida sotta departament ókilderi satýshy tarap telefonnyń ne sebepti qyzyp, qýatty tez joǵaltqanyn dáleldei almaǵanyn málimdedi. Sondai-aq qurylǵydaǵy aqaýlar tutynýshynyń kelisiminsiz joiylmaq bolǵan. Budan bólek, servis ortalyǵyna jiberilgen kezde negizgi shaǵymdardyń biri — telefonnyń qyzyp ketýi qujatta kórsetilmegeni aityldy.
Al "Ksell" ókilderi taǵylǵan aiyppen kelispeitinin jetkizdi. Kompaniia baǵdarlamalyq qaita ornatý qalypty diagnostikalyq protsedýra ekenin jáne jóndeý jumysy sanalmaitynyn alǵa tartqan. Degenmen sot memlekettik organnyń talaby tolyq ári tiisti deńgeide oryndalmaǵan degen qorytyndyǵa keldi.
Sot málimetinshe, kompaniia "Tutynýshylardyń quqyqtaryn qorǵaý týraly" zańnyń 30-babyndaǵy birneshe talapty buzǵan.
