پرەزيدەنت توقايەۆ ۇكىمەتتىڭ كەڭەيتىلگەن وتىرىسىندا ۇلتتىق بانكتىڭ قىزمەتىنە توقتالىپ، قارجى رەتتەۋشىسىنىڭ بۇرىنعى ۇستانىمى قازىرگى جاعدايدا ءتيىستى ناتيجە بەرمەيتىنىن مالىمدەدى، دەپ حابارلايدى Dalanews.kz.
مەملەكەت باسشىسىنىڭ ايتۋىنشا، ۇلتتىق بانك ءوزىنىڭ مانداتى اياسىندا جۇمىس ىستەپ جاتىر، الايدا بۇل باعىتتا ءبىرقاتار ماسەلە ساقتالۋدا. سونىڭ ىشىندە حالىقتى ەڭ الدىمەن ۇلتتىق ۆاليۋتا – تەڭگەنىڭ تۇراقسىزدىعى الاڭداتادى. ساراپشىلاردىڭ بولجامى بويىنشا، اقش دوللارىنىڭ نىعايۋى تەڭگەگە قىسىم كورسەتىپ، باعامنىڭ قۇبىلۋىنا اسەر ەتۋى مۇمكىن.
“ۇلتتىق بانكتىڭ ۇكىمەتپەن تىعىز ىنتىماقتاستىقتا ينفلياسيانى اۋىزدىقتاۋ جانە ۆاليۋتا تۇراقتىلىعىن قامتاماسىز ەتۋ جونىندەگى جۇمىسى اسا ماڭىزدى”، – دەدى پرەزيدەنت.
توقايەۆ ۇكىمەتتىڭ كەڭەيتىلگەن وتىرىسىندا قارجى سالاسىنداعى احۋالدى “ەرەكشە” دەپ اتاپ ءوتتى. ونىڭ پىكىرىنشە، ۇلتتىق بانكتىڭ “تاۋەلسىزدىك، ءوز بەتىنشە ارەكەت ەتۋ” قاعيداتىنا سۇيەنگەن ەسكى ءتاسىلى قازىرگىدەي كۇردەلى جاعدايدا جەتكىلىكسىز بولۋى مۇمكىن.
“بۇرىنعى ‘ءبىز تاۋەلسىزبىز، جەكە ارەكەت ەتەمىز’ دەگەن ۇستانىم ەندى جۇمىس ىستەمەيدى، سەبەبى جاعداي وزگەشە. بۇل تۋرالى كەيىنىرەك ناقتىراق ايتاتىن بولامىن”، – دەدى مەملەكەت باسشىسى.
ساراپشىلار ۇلتتىق بانكتىڭ ۇكىمەتپەن قاتار ارەكەت ەتۋى ينفلياسيا مەن ۆاليۋتانىڭ تۇراقتىلىعىنا تىكەلەي ىقپال ەتەدى دەپ سانايدى. ال توقايەۆتىڭ “جاڭا ءتاسىل” تۋرالى مالىمدەمەسى قارجى نارىعىن رەتتەۋدە ءارى قاراي قانداي وزگەرىستەر بولاتىنىنا قوعامنىڭ نازارىن اۋدارىپ وتىر.
