نۇر-سۇلتان قالاسىنىڭ تۇرعىندارى كوروناۆيرۋسقا قارسى ۆاكسيناسيانى قولدادى. قالا تۇرعىندارى پاندەميامەن كۇرەستە يممۋنداۋدىڭ ماڭىزدىلىعى تۋرالى پىكىر ءبىلدىردى، دەپ حابارلايدى ەلوردا اكىمدىگىنىڭ رەسمي سايتى.

نۇر-سۇلتاندا كۇن سايىن كۆي جۇقتىرعان ناۋقاستار قاتارى كوبەيىپ كەلەدى. وتكەن تاۋلىكتىڭ وزىندە 1500-دەن استام ناۋقاس انىقتالدى. قالاداعى ەپيدەميولوگيالىق جاعداي ءالى دە تۇراقسىز. وسىعان بايلانىستى كارانتيندىك شارالار كۇشەيتىلىپ، دەمالىس كۇندەرىنە ارنايى شەكتەۋلەر ەنگىزىلدى.

دەگەنمەن ۆاكسيناسيا ارقىلى ۇجىمدىق يممۋنيتەت قالىپتاسپاسا، بۇل شارالار ينفەكسيانىڭ ءوسۋىن توقتاتپايدى.

يممۋنداۋدى مەديسينا قىزمەتكەرلەرى، زيالى قاۋىم وكىلدەرى، مادەنيەت قايراتكەرلەرى، بەلگىلى سپورتشىلار جانە ەلوردا تۇرعىندارى قولدايدى:

«مەن ۆاكسيناسيانى قولدايمىن. ۆاكسينانىڭ ءبىرىنشى كومپونەنتىن الدىم، جاقىندا ەكىنشىسىن الامىن. بالا كۇنىمىزدە ءبارىمىز بسج سەكىلدى ۆاكسيناسيا الدىق. مەنىڭ ويىمشا، بۇل ۆاكسينا دا سول سياقتى. دارى-دارمەكتەردى عالىمدار، ماماندار ازىرلەيدى، ولارعا سەنۋگە بولادى جانە ماڭىزدى دەپ سانايمىن»، - دەدى ەلوردا تۇرعىنى.

ەلوردانىڭ وزگە تۇرعىندارى دا ءوز ويىن انىق جەتكىزدى:

«ءبارى ۆاكسيناسيادان ءوتۋى كەرەك. ۆاكسينا الماعانداردى قىلمىسكەر دەپ سانايمىن. سەبەبى وزگەلەردىڭ قاۋىپسىزدىگى ءۇشىن الەۋمەتتىك جاۋاپكەرشىلىك بولۋى كەرەك. ۆاكسيناسيانى پاندەميامەن كۇرەسۋدىڭ ەڭ دۇرىس ءادىسى دەپ سانايمىن. ادامزات بۇگىنگە دەيىن اۋىر جۇقپالى اۋرۋلاردى ۆاكسينامەن جەڭدى. ءبىز عىلىمعا سەنەمىز».

قالا تۇرعىندارىنىڭ كوپشىلىگى ۆاكسيناسياعا وڭ كوزقاراسپەن قارايدى. سەبەبى ەلدە جانە بۇكىل الەمدە پاندەميا ءورشىپ تۇرعان كەزدە، حالىقتىڭ دەنساۋلىعىن ساقتاۋدىڭ جالعىز ءادىسى – ۆاكسينا ارقىلى يممۋنداۋ.

«اپكەم دە، وزگە دە تۋىستارىم مەديسينا سالاسىندا جۇمىس ىستەيدى. ءبارىمىز ەكپە الدىق. ەشقانداي جاعىمسىز اسەرى بايقالعان جوق»، - دەدى ەلوردا تۇرعىنى.

«مەنىڭ ويىمشا، ۆاكسيناسيادان باسقا ەمدەلۋدىڭ ءتيىمدى ءادىسى جوق. بۇل تۋرالى جۇرتتىڭ پىكىرى ءارتۇرلى. ءبىراق داۋدىڭ سەبەبىن ءالى كۇنگە تۇسىنە المايمىن. ۆاكسينا الۋىمىز كەرەك. وزگە جانداردىڭ دەنساۋلىعىن قاتەرگە تىگۋگە بولمايدى»، - دەيدى تاعى ەلوردا تۇرعىن.



قالا تۇرعىندارىنىڭ ءبىر بولىگى ۆاكسيناسياعا قارسى شىعۋ ارقىلى وزىنە عانا ەمەس، وزگەلەردىڭ دەنساۋلىعىنا دا ءقاۋىپ توندىرەتىنىن جەتكىزدى:

«قورقىنىشپەن ءومىر سۇرۋدەن شارشادىم! ۆاكسينا عانا ىندەتتى جەڭەتىنىن جۇرت قاشان تۇسىنەدى ەكەن!؟ ۆاكسيناسيالانباعاندار وزىنە عانا ەمەس، وزگەلەرگە دە ءقاۋىپ توندىرەدى!»

ايتا كەتەيىك، 24 شىلدەدەگى جاعداي بويىنشا نۇر-سۇلتاندا كوروناۆيرۋسقا قارسى ۆاكسينانىڭ ءبىرىنشى كومپونەنتىن 325 مىڭنان استام ادام الدى، ال 215 مىڭنان استام ازامات تولىق يممۋنداۋدان ءوتتى.

https://youtu.be/24Iw4zDOqOo