Nur-Sultanda kún saıyn KVI juqtyrǵan naýqastar qatary kóbeıip keledi. Ótken táýliktiń ózinde 1500-den astam naýqas anyqtaldy. Qaladaǵy epıdemıologıalyq jaǵdaı áli de turaqsyz. Osyǵan baılanysty karantındik sharalar kúsheıtilip, demalys kúnderine arnaıy shekteýler engizildi.
Degenmen vaksınasıa arqyly ujymdyq ımýnıtet qalyptaspasa, bul sharalar ınfeksıanyń ósýin toqtatpaıdy.
Immýndaýdy medısına qyzmetkerleri, zıaly qaýym ókilderi, mádenıet qaıratkerleri, belgili sportshylar jáne elorda turǵyndary qoldaıdy:
«Men vaksınasıany qoldaımyn. Vaksınanyń birinshi komponentin aldym, jaqynda ekinshisin alamyn. Bala kúnimizde bárimiz BSJ sekildi vaksınasıa aldyq. Meniń oıymsha, bul vaksına da sol sıaqty. Dári-dármekterdi ǵalymdar, mamandar ázirleıdi, olarǵa senýge bolady jáne mańyzdy dep sanaımyn», - dedi elorda turǵyny.
Elordanyń ózge turǵyndary da óz oıyn anyq jetkizdi:
«Bári vaksınasıadan ótýi kerek. Vaksına almaǵandardy qylmysker dep sanaımyn. Sebebi ózgelerdiń qaýipsizdigi úshin áleýmettik jaýapkershilik bolýy kerek. Vaksınasıany pandemıamen kúresýdiń eń durys ádisi dep sanaımyn. Adamzat búginge deıin aýyr juqpaly aýrýlardy vaksınamen jeńdi. Biz ǵylymǵa senemiz».
Qala turǵyndarynyń kópshiligi vaksınasıaǵa oń kózqaraspen qaraıdy. Sebebi elde jáne búkil álemde pandemıa órship turǵan kezde, halyqtyń densaýlyǵyn saqtaýdyń jalǵyz ádisi – vaksına arqyly ımmýndaý.
«Ápkem de, ózge de týystarym medısına salasynda jumys isteıdi. Bárimiz ekpe aldyq. Eshqandaı jaǵymsyz áseri baıqalǵan joq», - dedi elorda turǵyny.
«Meniń oıymsha, vaksınasıadan basqa emdelýdiń tıimdi ádisi joq. Bul týraly jurttyń pikiri ártúrli. Biraq daýdyń sebebin áli kúnge túsine almaımyn. Vaksına alýymyz kerek. Ózge jandardyń densaýlyǵyn qaterge tigýge bolmaıdy», - deıdi taǵy elorda turǵyn.
Qala turǵyndarynyń bir bóligi vaksınasıaǵa qarsy shyǵý arqyly ózine ǵana emes, ózgelerdiń densaýlyǵyna da qaýip tóndiretinin jetkizdi:
«Qorqynyshpen ómir súrýden sharshadym! Vaksına ǵana indetti jeńetinin jurt qashan túsinedi eken!? Vaksınasıalanbaǵandar ózine ǵana emes, ózgelerge de qaýip tóndiredi!»
Aıta keteıik, 24 shildedegi jaǵdaı boıynsha Nur-Sultanda koronavırýsqa qarsy vaksınanyń birinshi komponentin 325 myńnan astam adam aldy, al 215 myńnan astam azamat tolyq ımmýndaýdan ótti.
https://youtu.be/24Iw4zDOqOo
