بقو. ءبورلى اۋدانىندا سۋ تاسقىنىنان زارداپ شەككەن 50 وتباسى باسپانالى بولدى

جاربول كەنت ۇلى 01 ماۋ. 2024 22:11 2825

مەملەكەت باسشىسى سۋ تاسقىنىنان زارداپ شەككەن تۇرعىندارعا جان-جاقتى قولداۋ كورسەتۋدى تاپسىرعان بولاتىن.

باتىس قازاقستان وبلىسى ءبورلى اۋدانىندا سۋ تاسقىنىنان زارداپ شەككەن 66 وتباسىعا باسپانا ساتىپ الىنۋدا.
بۇگىن اۋدان بويىنشا 50 وتباسى پاتەرلەرىنە قونىس اۋداردى. قالعان 16 تۇرعىنعا جاقىن ۋاقىتتا پاتەرلەر ساتىپ الىنادى.

ءبورلى اۋدانى بويىنشا 60 تۇرعىن ءۇيدىڭ قۇرىلىسى جۇرگىزىلۋدە. جوسپارعا سايكەس، ءار ءۇيدىڭ اۋدانى 80 شارشى مەتر بولادى.
سۋ تاسقىنىنان زارداپ شەككەن ءلايلا جۇماعالييەۆا ەسىمدى كوپ بالالى انا ساتىپ الىنعان پاتەرىنە كىرىپ، مەملەكەت تاراپىنان جاسالىپ جاتقان كومەك ءۇشىن العىسىن ءبىلدىردى.

«سۋ تاسقىنى سالدارىنان ءبورلى اۋدانى پۋگاچيەۆ اۋىلىنداعى ءۇيىمىز جارامسىز بولىپ قالدى. كوميسسيانىڭ قورىتىندىسى بويىنشا اقساي قالاسىنان ءۇي ساتىپ الۋعا كەلىستىك. ءتورت بولمەلى پاتەرگە كىرىپ وتىرمىز. ەندى قۋانىشىمىزدا شەك جوق. قولداۋى ءۇشىن ءبىرىنشى كەزەكتە پرەزيدەنتىمىزگە العىس بىلدىرەمىز»- دەدى ءلايلا جۇماعالييەۆا.

سونداي-اق، سۋ تاسقىنان زارداپ شەككەن اۋدان تۇرعىندارىنا 150 ايلىق ەسەپتىك كورسەتكىش مولشەرىندەگى الەۋمەتتىك تولەمدەر جۇرگىزىلدى. بۇگىندە ءبورلى اۋدانى بويىنشا تۇرمىستىق زاتتار مەن جيھازداردىڭ شىعىنىن وتەۋ ءۇشىن 168 وتباسىعا 63 ملن تەڭگە كولەمىندە قارجى تولەندى.

باتىس قازاقستان وبلىسى اكىمىنىڭ تاپسىرماسى اياسىندا قازىرگى ۋاقىتتا قۇرىلىس جۇمىستارى قارقىندى جۇرگىزىلۋدە. وبلىس بويىنشا سۋ تاسقىنىنان زارداپ شەككەن اۋدانداردا 401 تۇرعىن ءۇي سالىنۋدا.
سونىمەن قاتار، باتىس قازاقستان وبلىسىنىڭ تەرەكتى اۋدانىندا - 5 ءۇي، بايتەرەك اۋدانىندا - 2 ءۇيساتىپ الىندى. ال، ورال قالاسىنداعى جالعىز باسپاناسى بولىپ ەسەپتەلەتىن، ۇيلەرى اپاتتى دەپ تانىلعان ساياجاي تۇرعىندارىنا الداعى ۋاقىتتا جاڭا ۇيلەر ساتىپ الۋ جانە سالۋ بويىنشا جۇمىستار جۇرگىزىلۋدە.

 


ۇسىنىلعان
سوڭعى جاڭالىقتار