Memleket basshysy sý tasqynynan zardap shekken turǵyndarǵa jan-jaqty qoldaý kórsetýdi tapsyrǵan bolatyn.
Batys Qazaqstan oblysy Bórli aýdanynda sý tasqynynan zardap shekken 66 otbasyǵa baspana satyp alynýda.
Búgin aýdan boiynsha 50 otbasy páterlerine qonys aýdardy. Qalǵan 16 turǵynǵa jaqyn ýaqytta páterler satyp alynady.
Bórli aýdany boiynsha 60 turǵyn úidiń qurylysy júrgizilýde. Josparǵa sáikes, ár úidiń aýdany 80 sharshy metr bolady.
Sý tasqynynan zardap shekken Láilá Jumaǵalieva esimdi kóp balaly ana satyp alynǵan páterine kirip, memleket tarapynan jasalyp jatqan kómek úshin alǵysyn bildirdi.
«Sý tasqyny saldarynan Bórli aýdany Pýgachev aýylyndaǵy úiimiz jaramsyz bolyp qaldy. Komissiianyń qorytyndysy boiynsha Aqsai qalasynan úi satyp alýǵa kelistik. Tórt bólmeli páterge kirip otyrmyz. Endi qýanyshymyzda shek joq. Qoldaýy úshin birinshi kezekte Prezidentimizge alǵys bildiremiz»- dedi Láilá Jumaǵalieva.
Sondai-aq, sý tasqynan zardap shekken aýdan turǵyndaryna 150 ailyq eseptik kórsetkish mólsherindegi áleýmettik tólemder júrgizildi. Búginde Bórli aýdany boiynsha turmystyq zattar men jihazdardyń shyǵynyn óteý úshin 168 otbasyǵa 63 mln teńge kóleminde qarjy tólendi.
Batys Qazaqstan oblysy ákiminiń tapsyrmasy aiasynda qazirgi ýaqytta qurylys jumystary qarqyndy júrgizilýde. Oblys boiynsha sý tasqynynan zardap shekken aýdandarda 401 turǵyn úi salynýda.
Sonymen qatar, Batys Qazaqstan oblysynyń Terekti aýdanynda - 5 úi, Báiterek aýdanynda - 2 úisatyp alyndy. Al, Oral qalasyndaǵy jalǵyz baspanasy bolyp esepteletin, úileri apatty dep tanylǵan saiajai turǵyndaryna aldaǵy ýaqytta jańa úiler satyp alý jáne salý boiynsha jumystar júrgizilýde.
