ق ر پرەمەر-مينيسترىنىڭ ورىنباسارى قانات بوزىمبايەۆ ۇكىمەتتە وتكەن بريفينگتە حالىقتىڭ الەۋمەتتىك وسال توپتارىن كوممۋنالدىق قىزمەتتەر تاريفتەرىنىڭ كۇرت وسىمىنەن قورعاۋ ءۇشىن قانداي شارالار قاراستىرىلعانىن ايتتى، دەپ حابارلايدى Dalanews.kz.

ونىڭ ايتۋىنشا، ەلىمىزدە جەرگىلىكتى بيۋدجەت ەسەبىنەن كوممۋنالدىق قىزمەتتەر تولەمىن تولەۋگە جۇمسالاتىن شىعىستاردىڭ ءبىر بولىگىن وتەۋگە مۇمكىندىك بەرەتىن تۇرعىن ءۇي كومەگى دەگەن تەتىك جۇمىس ىستەپ تۇر.

"ءبىز ونى كەزىندە ۇكىمەتتىڭ الەۋمەتتىك بلوگىمەن بىرلەسىپ پىسىقتاعانبىز. وتباسىنىڭ جيىنتىق تابىسىندا كوممۋنالدىق قىزمەتتەرگە جۇمسالاتىن شىعىستار بەلگىلى ءبىر شەكتەن اسىپ كەتكەن كەزدەگى ايىرمانى مەملەكەت جابادى"، دەپ تۇسىندىرەدى قانات بوزىمبايەۆ.

ەگەر كوممۋنالدىق قىزمەتتەردى تولەۋگە ارنالعان اي سايىنعى شىعىندار ءماسليحاتتار مەن اكىمدىكتەر بەلگىلەگەن وتباسىنىڭ جالپى تابىسىنىڭ پايىزدىق شەگىنەن اسسا، وندا ارتىلعانى جەرگىلىكتى بيۋدجەت ەسەبىنەن وتەلەدى.

ونىڭ ايتۋىنشا، تۇرعىن ءۇي-كوممۋنالدىق قىزمەتتەردىڭ اي سايىنعى تولەمدەر سوماسى وتباسىنىڭ جالپى تابىسىنا قاتىستى بەلگىلى ءبىر شەكتەن اساتىن جاعدايلاردا كومەك قاراستىرىلادى.  بۇل شەك ەلىمىزدەگى وڭىرلەرگە قاراي وزگەرىپ وتىرادى: ماسەلەن، استانا سياقتى ءىرى قالالاردا كورسەتكىش 10%-دان استام بولۋى مۇمكىن، ال اتىراۋ نەمەسە قىزىلوردا سياقتى وڭىرلەردە ودان تومەن، شامامەن 5-7% دەڭگەيىندە بەلگىلەنگەن.

تولەم مولشەرى تۇرعىن ءۇي الاڭىنىڭ نورماتيۆتەرىنە دە بايلانىستى. ەگەر ۇلكەن وتباسى ءۇش بولمەلى پاتەردە تۇرسا، وتەماقى شىعىنداردىڭ تولىق سوماسىن قۇرايدى. ەگەر بىرنەشە وتباسى مۇشەلەرى اۋدانى 800-1000 شارشى مەتر بولاتىن ۇلكەن ۇيدە تۇرسا، تولەم بەلگىلەنگەن الەۋمەتتىك نورمالارمەن شەكتەلەدى.

ايتا كەتسەك، الەۋمەتتىك ءاميان ەلىمىزدە كوروناۆيرۋس كەزىندە جۇمىسسىز قالعان ەل ازاماتتارىنا 42 500 تەڭگە تاراتۋ كەزىندە العاش رەت وزەكتىلىك تانىتىپ، ول 2020 جىلى ەنگىزىلدى. بۇعان مەملەكەت تاراپىنان بولىنگەن جاردەماقى، كومەك اقشا سەكىلدى كەز كەلگەن اقشا كەلىپ ءتۇسىپ وتىرادى. ماسەلەن، ءسىز ءبىر اۋرۋ تۇرىمەن اۋرۋحانادا ەسەپتە تۇرسىز دەلىك ءارى سىزگە بەلگىلى ءبىر دارى-دارمەك تەگىن بەرىلۋى ءتيىس. ءبىراق تەگىن ءدارىنى وسى كۇنگە دەيىن الىپ كورگەن جوقسىز دەلىك. ءبىراق ول ونىڭ بەرىلمەي جاتقانىن بىلدىرمەيدى. ۇكىمەتتەن وسى قاراجاتتى الىپ، پايدالانىپ وتىرعان باسقا بىرەۋلەر بولۋى ىقتيمال. وسى جاعىنان العاندا، الەۋمەتتىك ءاميان - ەل ازاماتىنا بيۋدجەتتەن بەرىلگەن اقشانىڭ ناقتى جەتكەنىن، ونىڭ قايدا جۇمسالعانىن باقىلاۋعا مۇمكىندىك بەرەتىن قۇرال.