QR Premer-ministriniń orynbasary Qanat Bozymbaev Úkimette ótken brifingte halyqtyń áleýmettik osal toptaryn kommýnaldyq qyzmetter tarifteriniń kúrt ósiminen qorǵaý úshin qandai sharalar qarastyrylǵanyn aitty, dep habarlaidy Dalanews.kz.
Onyń aitýynsha, elimizde jergilikti biýdjet esebinen kommýnaldyq qyzmetter tólemin tóleýge jumsalatyn shyǵystardyń bir bóligin óteýge múmkindik beretin turǵyn úi kómegi degen tetik jumys istep tur.
"Biz ony kezinde Úkimettiń áleýmettik blogymen birlesip pysyqtaǵanbyz. Otbasynyń jiyntyq tabysynda kommýnaldyq qyzmetterge jumsalatyn shyǵystar belgili bir shekten asyp ketken kezdegi aiyrmany memleket jabady", dep túsindiredi Qanat Bozymbaev.
Eger kommýnaldyq qyzmetterdi tóleýge arnalǵan ai saiynǵy shyǵyndar máslihattar men ákimdikter belgilegen otbasynyń jalpy tabysynyń paiyzdyq sheginen assa, onda artylǵany jergilikti biýdjet esebinen óteledi.
Onyń aitýynsha, turǵyn úi-kommýnaldyq qyzmetterdiń ai saiynǵy tólemder somasy otbasynyń jalpy tabysyna qatysty belgili bir shekten asatyn jaǵdailarda kómek qarastyrylady. Bul shek elimizdegi óńirlerge qarai ózgerip otyrady: máselen, Astana siiaqty iri qalalarda kórsetkish 10%-dan astam bolýy múmkin, al Atyraý nemese Qyzylorda siiaqty óńirlerde odan tómen, shamamen 5-7% deńgeiinde belgilengen.
Tólem mólsheri turǵyn úi alańynyń normativterine de bailanysty. Eger úlken otbasy úsh bólmeli páterde tursa, ótemaqy shyǵyndardyń tolyq somasyn quraidy. Eger birneshe otbasy músheleri aýdany 800-1000 sharshy metr bolatyn úlken úide tursa, tólem belgilengen áleýmettik normalarmen shekteledi.
Aita ketsek, áleýmettik ámiian elimizde koronavirýs kezinde jumyssyz qalǵan el azamattaryna 42 500 teńge taratý kezinde alǵash ret ózektilik tanytyp, ol 2020 jyly engizildi. Buǵan memleket tarapynan bólingen járdemaqy, kómek aqsha sekildi kez kelgen aqsha kelip túsip otyrady. Máselen, Siz bir aýrý túrimen aýrýhanada esepte tursyz delik ári Sizge belgili bir dári-dármek tegin berilýi tiis. Biraq tegin dárini osy kúnge deiin alyp kórgen joqsyz delik. Biraq ol onyń berilmei jatqanyn bildirmeidi. Úkimetten osy qarajatty alyp, paidalanyp otyrǵan basqa bireýler bolýy yqtimal. Osy jaǵynan alǵanda, áleýmettik ámiian - el azamatyna biýdjetten berilgen aqshanyń naqty jetkenin, onyń qaida jumsalǵanyn baqylaýǵa múmkindik beretin qural.
