الماتى تەحنولوگيالىق ۋنيۆەرسيتەتىنىڭ (اتۋ) ستۋدەنتتەرىنە قولايلى جاعداي جاساۋعا سوت شەشىمىنىڭ ورىندالماۋى ۇلكەن كەدەرگى بولىپ تۇر. داۋدىڭ باسى مارقۇم بولات نازاربايەۆقا تيەسىلى نيكولسكيي بازارىنىڭ زاڭسىز ارەكەتتەرىنەن باستالادى. بۇل تۋرالى قارجى ساراپشىسى ايبار ولجايەۆ Facebook-پاراقشاسىندا جازدى، دەپ حابارلايدى Dalanews.kz.

ايبار ولجايەۆتىڭ مالىمەتىنشە، 2011 جىلى “ساۋلەت-قۇرىلىس” كومپانياسى الماتى ورتالىعىنداعى بۇرىنعى نيكولسكيي بازارىنىڭ جەر تەلىمىن ۋنيۆەرسيتەتكە ساتتى. ول كەزدە جەر اليانس بانككە كەپىلگە قويىلعان ەدى. اتۋ كەڭەيۋ جوسپارىنا سايكەس، بۇل اۋماققا تەحنولوگيالىق پارك، جاتاقحانا جانە وقۋ عيماراتتارىن سالۋ ءۇشىن 583 ميلليون تەڭگە تولەپ، جەردى بانك كەپىلىنەن شىعارىپ، ادىلەت ورگاندارىندا زاڭدى تۇردە تىركەگەن.

الايدا، بولات نازاربايەۆتىڭ ادامدارى ۋنيۆەرسيتەت قىزمەتكەرلەرىن بازار اۋماعىنا كىرگىزبەي قويعان، ال سول كەزدەگى سوت بيلىگى بۇل زاڭسىز ارەكەتكە شارا قولدانا الماعان.

2023 جىلى بۇل ىسكە باس پروكۋراتۋرانىڭ ارالاسىپ، جوعارعى سوت بۇرىنعى سوت شەشىمدەرىن قايتا قاراپ، ۋنيۆەرسيتەتتىڭ بازاردى ساتىپ الۋ كەلىسىمىنىڭ زاڭدى كۇشىن قايتا قالپىنا كەلتىردى. ءبىراق سوت قاۋلىسى ءالى كۇنگە دەيىن ورىندالماي، وقۋ ورنى قۇرىلىس جۇمىستارىن باستاي الماي وتىر.

بۇل ىسكە رەيدەرلىك ارەكەتتەرىمەن تانىلعان قوسپايەۆتار توبىنىڭ قاتىسى بار.

اتۋ ساتىپ العان جەر كەيىن باسقا كومپانياعا اۋدارىلىپ كەتكەن، ال ۋنيۆەرسيتەتتىڭ پرەزيدەنتكە جازعان حاتتارى الماتى پروكۋراتۋراسىنا جىبەرىلگەنىمەن، جەر تەلىمىنە قاتىستى تالاپتارى قاناعاتتاندىرىلمادى.

قازىرگى تاڭدا بولات نازاربايەۆتىڭ زاڭسىز اكتيۆتەرىنە قاتىستى قىلمىستىق ءىس اياسىندا بۇل جەر مەملەكەت مەنشىگىنە قايتارىلۋى مۇمكىن. ءبىراق وقۋ ورنى قارجىلىق شىعىنعا ۇشىراپ، وسى داۋدىڭ قۇربانى بولىپ وتىر.

"اتۋ ادىلدىك ورنايدى دەپ ۇمىتتەنۋدەن باسقا امالى جوق. ۋنيۆەرسيتەتتىڭ زاڭدى مۇددەسىن قورعاپ جۇرگەن بەلگىلى ادۆوكات جاقسىلىق دولدا بۇل ماسەلەگە بايلانىستى قايتادان سوتقا شاعىم ءتۇسىرۋدى جوسپارلاپ وتىرعانىن ايتتى"، دەيدى ايبار ولجايەۆ.

نەگىزگى تالاپ – ۋنيۆەرسيتەتپەن جاسالعان ساتۋ-ساتىپ الۋ كەلىسىمشارتى بولا تۇرا، بازار اۋماعىنىڭ ءۇشىنشى تۇلعالارعا ساتىلعانىن زاڭسىز دەپ تانۋ.