Almaty tehnologiialyq ýniversitetiniń (ATÝ) stýdentterine qolaily jaǵdai jasaýǵa sot sheshiminiń oryndalmaýy úlken kedergi bolyp tur. Daýdyń basy marqum Bolat Nazarbaevqa tiesili Nikolskii bazarynyń zańsyz áreketterinen bastalady. Bul týraly qarjy sarapshysy Aibar Oljaev Facebook-paraqshasynda jazdy, dep habarlaidy Dalanews.kz.
Aibar Oljaevtyń málimetinshe, 2011 jyly “Sáýlet-Qurylys” kompaniiasy Almaty ortalyǵyndaǵy burynǵy Nikolskii bazarynyń jer telimin ýniversitetke satty. Ol kezde jer Alians bankke kepilge qoiylǵan edi. ATÝ keńeiý josparyna sáikes, bul aýmaqqa tehnologiialyq park, jataqhana jáne oqý ǵimarattaryn salý úshin 583 million teńge tólep, jerdi bank kepilinen shyǵaryp, ádilet organdarynda zańdy túrde tirkegen.
Alaida, Bolat Nazarbaevtyń adamdary ýniversitet qyzmetkerlerin bazar aýmaǵyna kirgizbei qoiǵan, al sol kezdegi sot biligi bul zańsyz áreketke shara qoldana almaǵan.
2023 jyly bul iske Bas prokýratýranyń aralasyp, Joǵarǵy sot burynǵy sot sheshimderin qaita qarap, ýniversitettiń bazardy satyp alý kelisiminiń zańdy kúshin qaita qalpyna keltirdi. Biraq sot qaýlysy áli kúnge deiin oryndalmai, oqý orny qurylys jumystaryn bastai almai otyr.
Bul iske reiderlik áreketterimen tanylǵan Qospaevtar tobynyń qatysy bar.
ATÝ satyp alǵan jer keiin basqa kompaniiaǵa aýdarylyp ketken, al ýniversitettiń Prezidentke jazǵan hattary Almaty prokýratýrasyna jiberilgenimen, jer telimine qatysty talaptary qanaǵattandyrylmady.
Qazirgi tańda Bolat Nazarbaevtyń zańsyz aktivterine qatysty qylmystyq is aiasynda bul jer memleket menshigine qaitarylýy múmkin. Biraq oqý orny qarjylyq shyǵynǵa ushyrap, osy daýdyń qurbany bolyp otyr.
"ATÝ ádildik ornaidy dep úmittenýden basqa amaly joq. Ýniversitettiń zańdy múddesin qorǵap júrgen belgili advokat Jaqsylyq Dolda bul máselege bailanysty qaitadan sotqa shaǵym túsirýdi josparlap otyrǵanyn aitty", deidi Aibar Oljaev.
Negizgi talap – ýniversitetpen jasalǵan satý-satyp alý kelisimsharty bola tura, bazar aýmaǵynyń úshinshi tulǵalarǵa satylǵanyn zańsyz dep taný.
