2025 جىلدىڭ التى ايىنىڭ قورتىندىسى بويىنشا بجزق تابىسى جاعىنان العاش رەت مينۋستان شىقتى. الايدا، ازىرگە بجزق-نىڭ ينۆەستيسيالىق تابىستىلىعى جىل باسىنان بەرى جيناقتالعان ينفلياسيا كولەمىن وتەۋگە كەلگەندە قاۋقارسىز، دەپ حابارلايدى Dalanews.kz.

بانكتىڭ ينۆەستيسيالىق قىزمەتىنە جۇرگىزىلگەن تالداۋعا سۇيەنسەك، بجزق زەينەتاقى اكتيۆتەرىنىڭ كىرىستىلىگى 2025 جىلدىڭ التى ايىندا پليۋسكە شىعىپ، جىل باسىنان باستاپ شىلدە ايىنا دەيىن ەسەپتەلگەن ينۆەستيسيالىق تابىس مولشەرى 370،99 ملرد تەڭگەنى قۇرادى.

كىرىس كورسەتكىشى جىل باسىنان بەرى 1،51% (ءبىر اي بۇرىن – مينۋس 0،69%) قۇرادى، ءبىراق ونىڭ، ازىرگە جىل باسىنان بەرى جيناقتالعان ينفلياسيانى (شامامەن 7%) جابۋعا شاماسى كەلمەيدى. 

سوڭعى 12 ايدا ەسەپتەلگەن ينۆەستيسيالىق كىرىستىڭ مولشەرى شامامەن 2،53 ترلن تەڭگەنى قۇرادى، وسى كەزەڭدەگى كىرىستىلىك 11،8% ينفلياسيا كەزىندە 12،22% بولدى.

"زەينەتاقى اكتيۆتەرىنىڭ جەكەلەگەن قىسقا مەرزىمدى كەزەڭدەردەگى كىرىستىلىگى ولاردى باسقارۋ تيىمدىلىگىنىڭ كورسەتكىشى بولىپ تابىلمايدى، ويتكەنى قارجى قۇرالدارى جانە قىسقا ۋاقىت ىشىندە ەسەپتەلگەن باسقا وپەراسيالار بويىنشا سىياقى تۇرىندەگى كىرىستەر ءارقاشان وسى كەزەڭدەگى باعالى قاعازدار مەن ۆاليۋتا باعامدارى قۇنىنىڭ اۋىتقۋىنان تۋىندايتىن ايىرمانى جابا بەرمەيدى. سوندىقتان ينۆەستيسيالىق تابىس مولشەرىن وبەكتيۆتى تالداۋ ءۇشىن كەم دەگەندە ءبىر جىل ىشىندەگى ەسەپ-قيساپتار كەرەك بولادى"، - دەيدى بجزق-داعىدار.

 1 شىلدەدەگى جاعداي بويىنشا ۇلتتىق بانكتىڭ سەنىمگەرلىك باسقارۋىنداعى بجزق زەينەتاقى اكتيۆتەرىنىڭ سوماسى 23،47 ترلن تەڭگەنى قۇرادى.

بۇعان دەيىن سايتىمىزدا "زەينەتاقى اكتيۆتەرىنىڭ ينۆەستتابىسىن "جەپ جاتقان" نە نارسە نەمەسە كىم؟" دەگەن ماقالا جاريالانعان بولاتىن.