الماتىلىق «قايرات» فۋتبول كلۋبىنىڭ باس باپكەرى رافاەل ۋرازباحتين سوڭعى ماچتاردان كەيىن قاقپاشىلارعا بەرىلگەن قىمبات سىيلىقتارعا قاتىستى ءوز پىكىرىن ءبىلدىردى، دەپ حابارلايدى Dalanews.kz.
ونىڭ ايتۋىنشا، فۋتبول — كوماندالىق ويىن، سوندىقتان قولداۋ دا بۇكىل كلۋبقا باعىتتالۋى كەرەك.
«مەنىڭ ويىمشا، كومەكتەسكىسى كەلەتىندەر كلۋبقا كومەكتەسۋى قاجەت. نەمەسە سىيلىق بەرەتىن بولسا، بارلىق ويىنشىعا بىردەي بەرۋ كەرەك. مىسالى، كلۋبقا اۆتوبۋس نەمەسە شاعىن اۆتوبۋس الىپ بەرۋگە بولادى. كوماندالىق تۇرعىدان العاندا ءبىر ادامعا عانا كوڭىل ءبولۋ دۇرىس ەمەس دەپ ويلايمىن»، — دەدى ۋرازباحتين باسپا ءسوز ءماسليحاتىندا.
باس باپكەردىڭ ايتۋىنشا، فۋتبول – بىرلىكتى تالاپ ەتەتىن سپورت ءتۇرى، سوندىقتان تەك ءبىر ويىنشىنى ماراپاتتاۋ كوماندانىڭ رۋحىنا كەرى اسەر ەتۋى مۇمكىن.
«ءبىز بيزنەسمەندەرگە سىيلىق جاساۋعا تىيىم سالا المايمىز، ءبىراق مۇنداي جاعدايدا بارشا ويىنشىنى قولداۋ – ەڭ دۇرىس شەشىم»، — دەپ تۇيىندەدى ۋرازباحتين.
ايتا كەتەيىك، «قايراتتىڭ» ليگا چەمپيوندارىنداعى جارقىن جەڭىستەرىنەن كەيىن جانكۇيەرلەر مەن دەمەۋشىلەر قاقپاشىلارعا ەرەكشە نازار اۋدارعان بولاتىن: 18 جاستاعى شەرحان قالمىرزاعا جانە «سەلتيككە» قارسى ويىندا ءۇش پەنالتيدى قايتارعان قاقپاشى تەمىرلان اناربەكوۆكە جاڭا كولىك سىيعا تارتىلدى.
