Almatylyq «Qairat» fýtbol klýbynyń bas bapkeri Rafael Ýrazbahtin sońǵy matchtardan keiin qaqpashylarǵa berilgen qymbat syilyqtarǵa qatysty óz pikirin bildirdi, dep habarlaidy Dalanews.kz.
Onyń aitýynsha, fýtbol — komandalyq oiyn, sondyqtan qoldaý da búkil klýbqa baǵyttalýy kerek.
«Meniń oiymsha, kómekteskisi keletinder klýbqa kómektesýi qajet. Nemese syilyq beretin bolsa, barlyq oiynshyǵa birdei berý kerek. Mysaly, klýbqa avtobýs nemese shaǵyn avtobýs alyp berýge bolady. Komandalyq turǵydan alǵanda bir adamǵa ǵana kóńil bólý durys emes dep oilaimyn», — dedi Ýrazbahtin baspasóz máslihatynda.
Bas bapkerdiń aitýynsha, fýtbol – birlikti talap etetin sport túri, sondyqtan tek bir oiynshyny marapattaý komandanyń rýhyna keri áser etýi múmkin.
«Biz biznesmenderge syilyq jasaýǵa tyiym sala almaimyz, biraq mundai jaǵdaida barsha oiynshyny qoldaý – eń durys sheshim», — dep túiindedi Ýrazbahtin.
Aita keteiik, «Qairattyń» Liga chempiondaryndaǵy jarqyn jeńisterinen keiin jankúierler men demeýshiler qaqpashylarǵa erekshe nazar aýdarǵan bolatyn: 18 jastaǵy Sherhan Qalmyrzaǵa jáne «Seltikke» qarsy oiynda úsh penaltidi qaitarǵan qaqpashy Temirlan Anarbekovke jańa kólik syiǵa tartyldy.
