بۇگىن بەيجىڭ قالاسىندا قىتايداعى قازاقستان ءتۋريزمى جىلى اياسىندا تۇركىستان وبلىسىنىڭ اكىمدىگى «NAURYZFEST» مەرەكەلىك ءىس-شاراسىن ۇيىمداستىردى. ايتۋلى شاراعا ق ر تۋريزم جانە سپورت ۆيسە-مينيسترى ەرجان ەركىنبايەۆ قاتىسىپ، ساتتىلىك تىلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

كونسەرت الاڭىنا جينالعان قاۋىمعا ۇلتتىق تاعامدار ۇسىنىلىپ، ءوڭىردىڭ تۋريستىك الەۋەتى قامتىلعان ءۇنپاراقتار تاراتىلدى.

تۇركىستان وبلىسىنىڭ شىعارماشىلىق ۇجىمدارى قازاق حالقىنىڭ تاڭداۋلى ان-كۇيى مەن ءبيىن كورەرمەندەرگە پاش ەتىپ، قوشەمەتكە بولەندى. ايتالىق، «سۇگىر» اتىنداعى قازاق-ۇلت اسپاپتار وركەسترى، «ياسسى» بي ءانسامبلى، «تاڭبا» ەتنوكۆارتەتى جانە انشىلەر بەيجىڭ حالقى مەن جۇڭگو قازاقتارىنا رۋحاني سەرپىلىس سىيلادى.

«شاشۋ»، «گاككۋ»، «تۇركىستان»، «سارىارقا»، «سۇگىردىڭ تەرمەسى»، «ماحامبەت»، «وتان» جانە تاعى باسقا ۇزدىك تۋىندىلار ورىندالىپ، تەاترلاندىرىلعان قويىلىم ساحنالاندى.

قازاقستاننىڭ قىتايداعى ەلشىلىگى مەن تۇركىستان وبلىسى مادەنيەت جانە تۋريزم باسقارماسىنىڭ بىرلەسىپ ۇيلەستىرۋىمەن وتكىزىلگەن «NAURYZFEST» ءىس-شاراسىنا ءوڭىردىڭ ونەرپازدارى، تۋريزم جانە مادەنيەت سالاسىنىڭ وكىلدەرى اتسالىستى.

ايتا كەتەيىك، بيىل قازاقستان-قىتاي اراسىنداعى مادەني-رۋحاني جانە تۋريزم باعىتتارى بويىنشا قارىم-قاتىناس ودان ءارى نىعايادى. 2024 جىل –قىتايداعى قازاقستان تۋريزم جىلى بولىپ بەكىتىلگەن.

28 ناۋرىز كۇنى بەيجىڭ قالاسىندا قىتايداعى قازاقستاننىڭ رەسمي اشىلۋى باستالعان بولاتىن. حالىقارالىق تۋريستىك كورمەگە تۇركىستان وبلىسى بەلسەنە قاتىسىپ، ءوڭىردىڭ تۋريستىك ونىمدەرىن ۇزدىك تانىتقانى ءۇشىن 2-ورىندى يەمدەندى.