بەسقاراعاي اۋدانىنداعى «سەمەي ورمانى» تابيعي رەزەرۆاتىنىڭ موروزوۆ فيليالى اۋماعىنداعى ورمان ءورتى بۇگىن، ساعات 8.00-دە وقشاۋلاندى. قازىرگى تاڭدا وقشاۋلانعان ءورتتى تولىق ءسوندىرۋ جۇمىستارى جۇرگىزىلۋدە، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.
اباي، شىعىس قازاقستان جانە پاۆلودار وبلىستارىنىڭ توتەنشە جاعدايلار دەپارتامەنتتەرى، وبلىستىق پوليسيا دەپارتامەنتى، «سەمەي ورمانى» مەن «ەرتىس ورمانى» مەكەمەلەرىنىڭ قىزمەتكەرلەرى جانە جەرگىلىكتى اتقارۋشى ورگاندار جاعدايدى ءالى دە باقىلاۋدا ۇستاپ وتىر.
قاراعاندى وبلىسى مەن استانا قالاسىنان قوسىمشا كۇشتەر مەن تەحنيكا كومەككە كەلدى.
الدىن الا بولجام بويىنشا ءورت 1200 گەكتار اۋماقتى شارپىعان. ونىڭ 800 گەكتارى دالا، 400 گەكتارى – ورمان القابى.
اباي وبلىسىنىڭ اكىمى بەرىك ءۋالي توتەنشە جاعدايلار مينيسترلىگىنىڭ وكىلدەرىمەن بىرگە بۇگىن تاڭەرتەڭ ورتتەن زارداپ شەككەن موروزوۆ فيليالىنىڭ سوسنوۆ ورمانشىلىعىنا تىكۇشاقپەن اۋەدەن باقىلاۋ جۇرگىزدى.
– تىكۇشاقپەن ورتەنگەن اۋماقتاردى مۇقيات قاراپ شىقتىق. ءورتتىڭ تولىق توقتاتىلعانىنا كوز جەتكىزىپ، ەلدى مەكەندەرگە، تۇرعىندارعا ءقاۋىپسىز بولۋىن باقىلاۋدا ۇستايمىز، – دەدى ايماق باسشىسى.
ءورتتى ءسوندىرۋ جۇمىستارىنا 419 ادام، 140-قا جۋىق تەحنيكا جۇمىلدىرىلدى.
ەسكە سالايىق، كەشە تۇستەن كەيىن بەسقاراعاي اۋدانىنىڭ بەسقاراعاي اۋىلىنىڭ شەتىندە قۇرعاق ءشوپ جانىپ، قاتتى جەلدىڭ ەكپىنىمەن قىزىل جالىن «سەمەي ورمانى» موروزوۆ فيليالى اۋماعىنا تارالعان بولاتىن.
