– بۇگىنگە دەيىن جەرگىلىكتى اتقارۋشى ورگاندار تاراپىنان ماتەريالدىق كومەك كورسەتۋ جۇمىسى جۇرگىزىلدى. زارداپ شەككەن 46 جولاۋشىعا ءبىر ميلليون تەڭگەدەن، ال جاقىنىنان ايىرىلعان 12 وتباسى ءتورت ميلليون تەڭگەدەن الدى، – دەلىنگەن ءماميننىڭ دەپۋتات ساۋالعا بەرگەن جاۋابىندا.
پرەمەردىڭ ايتۋىنشا، قازىرگى كەزدە Bek Air اۋە كومپانياسىنىڭ سەرتيفيكاتى توقتاتىلعان. مەملەكەتارالىق اۆياسيا كوميتەتى اۋە كەمەسىنىڭ وزدىگىنەن جازاتىن ەكى بورتتىق قۇرىلعىسىن جۇكتەدى. ماماندار قورىتىندى دايىنداپ جاتىر.
ال اپات سالدارىن تەرگەۋ ءىسىن ىشكى ىستەر مينيسترلىگىنىڭ جەدەل-تەرگەۋ توبى جۇرگىزىپ، باس كولىك پروكۋراتۋراسى باقىلايدى.
– سوتقا دەيىنگى تەرگەۋ جالعاسۋدا، ونىڭ ەكى نەگىزگى نۇسقاسى قاراستىرىلىپ جاتىر. ءبىرىنشىسى – ۇشاقتىڭ قاناتتارىنا مۇز قاتقان بولۋى مۇمكىن. بۇل نۇسقانى حالىقارالىق ساراپشىلار كومەگىمەن تەكسەرۋ ءۇشىن ۇشۋعا دەيىنگى دايىندىق كەزىندە اۋە كەمەسىن مۇزدان تازارتۋ پروسەدۋراسى تەكسەرىلىپ جاتىر. ەكىنشىسى – ۇشاقتىڭ تەحنيكالىق اقاۋى جانە ۇشقىشتىڭ قاتەلىگى، – دەدى ۇكىمەت باسشى.
سونىمەن قاتار، توتەنشە جاعداي كەزىندەگى ەكيپاجدىڭ ىس-ارەكەتىن باعالاۋعا باعىتتالعان تەرگەۋ امالدارى دا جالعاسادى.
– جۇمىس بەرۋشىلەرگە قايتىس بولعان جۇمىسشىلاردىڭ (اسىراۋىنداعى) وتباسىنا ساقتاندىرۋ تولەمدەرىن تولەۋ قاجەتتىگى تۋرالى ساقتاندىرۋ كومپانيالارىنا حابارلاۋ تاپسىرىلدى. ارنايى تەرگەۋ ماتەريالدارى پروسەدۋرالىق شەشىم قابىلداۋ ءۇشىن ىشكى ىستەر ورگاندارىنا جىبەرىلدى، – دەلىنگەن قۇجاتتا.
تۇتىنۋشىلاردىڭ قۇقىعىن قورعاۋ كوميتەتى وقيعا سالدارىنان توقتاتىلعان رەيس جولاۋشىلارىنا اقشانى قايتارىپ الۋ تۋرالى نۇر-سۇلتان قالاسىنىڭ ەكونوميكالىق سوتىنا شاعىم ءتۇسىردى.
2020 جىلدىڭ ءبىرىنشى جارتىجىلدىعىنىڭ سوڭىنا دەيىن جولاۋشىلاردى تۇراقتى رەيسپەن تاسىمالدايتىن ەلدەگى بارلىق اۋە كومپانيالارى تەكسەرۋدەن وتكىزىلەدى.
