– Búginge deiin jergilikti atqarýshy organdar tarapynan materialdyq kómek kórsetý jumysy júrgizildi. Zardap shekken 46 jolaýshyǵa bir million teńgeden, al jaqynynan aiyrylǵan 12 otbasy tórt million teńgeden aldy, – delingen Maminniń depýtat saýalǵa bergen jaýabynda.
Premerdiń aitýynsha, qazirgi kezde Bek Air áýe kompaniiasynyń sertifikaty toqtatylǵan. Memleketaralyq aviatsiia komiteti áýe kemesiniń ózdiginen jazatyn eki borttyq qurylǵysyn júktedi. Mamandar qorytyndy daiyndap jatyr.
Al apat saldaryn tergeý isin ishki ister ministrliginiń jedel-tergeý toby júrgizip, bas kólik prokýratýrasy baqylaidy.
– Sotqa deiingi tergeý jalǵasýda, onyń eki negizgi nusqasy qarastyrylyp jatyr. Birinshisi – ushaqtyń qanattaryna muz qatqan bolýy múmkin. Bul nusqany halyqaralyq sarapshylar kómegimen tekserý úshin ushýǵa deiingi daiyndyq kezinde áýe kemesin muzdan tazartý protsedýrasy tekserilip jatyr. Ekinshisi – ushaqtyń tehnikalyq aqaýy jáne ushqyshtyń qateligi, – dedi Úkimet basshy.
Sonymen qatar, tótenshe jaǵdai kezindegi ekipajdyń is-áreketin baǵalaýǵa baǵyttalǵan tergeý amaldary da jalǵasady.
– Jumys berýshilerge qaitys bolǵan jumysshylardyń (asyraýyndaǵy) otbasyna saqtandyrý tólemderin tóleý qajettigi týraly saqtandyrý kompaniialaryna habarlaý tapsyryldy. Arnaiy tergeý materialdary protsedýralyq sheshim qabyldaý úshin ishki ister organdaryna jiberildi, – delingen qujatta.
Tutynýshylardyń quqyǵyn qorǵaý komiteti oqiǵa saldarynan toqtatylǵan reis jolaýshylaryna aqshany qaitaryp alý týraly Nur-Sultan qalasynyń ekonomikalyq sotyna shaǵym túsirdi.
2020 jyldyń birinshi jartyjyldyǵynyń sońyna deiin jolaýshylardy turaqty reispen tasymaldaityn eldegi barlyq áýe kompaniialary tekserýden ótkiziledi.
