1 قازانداعى رەسمي دەرەكتەرگە سۇيەنسەك، وڭىردە 56 مىڭنان استام جۇمىس ورنى قۇرىلعان. ونىڭ 30 101ء-ى تۇراقتى. باسىم بولىگى «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى قولداۋ 2020-2021 جىلدارعا ارنالعان باعدارلاما نەگىزىندە قۇرىلعان.
يگى باستامانىڭ بارلىعى ەل الەۋەتىن ارتتىرۋعا ىقپال ەتكەنى ءسوزسىز. ايماقتىڭ دامۋىنا ۇلەس قوسىپ جاتقان كاسىپتىڭ ءبىر قاتارىن ءتىزىپ شىقساق. ينفروقۇرىلىمدىق نىساندار جاعىنان كوش باستايتىن بىردەن-بىر ءوڭىر ول-ەڭبەكشىقازاق اۋدانى. اتالعان جەردە ءىرى قۇرىلىس ۇيىمدارى جۇمىس جاسايدى. سونىڭ ءبىرى «التاير» وندىرىستىك كاسىبى. بۇل ۇيىم قۇرىلىس ماتەريالدارىن وندىرۋدە جانە قۇرىلىس-مونتاج جۇمىستارىن ورىنداۋدا كوشباسشى بولىپ تابىلادى. اعىمداعى جىلى 195-تەن استام جۇمىس ورنىن اشقان.
ايدىندى الاكولدە كوشتەن قالىسپاق ەمەس. ءۇشارال جەرىندەگى «باقىتبەك –قاراتال» جشس-ىندا جىل باسىنان 120 جۇمىس ونى قۇرىلعان. ەڭبەككە تارتىلعانداردىڭ 2ء-ۋى پروباسيالىق باقىلاۋدا ەسەپتە تۇرعاندار ەكەن. ەستەرىڭىزگە سالامىز، اتالمىش سەرىكتەستىك بالىق شارۋاشىلىعىمەن اينالىسادى.
ال، ۇيعىر اۋدانىندا ناۋبايحانا جانە اۆتوكولىك جۋۋ ىسىنە 10 ادام تارتىلعان. كاسىپ يەسى يارلين كۋدۋسوۆيچ ەسىمدى ازامات. اۋدان ورتالىقتارىنان بولەك، اۋىلدىق وكرۋگتەردە جۇمىسپەن قامتۋ ماسەلەسى وڭ شەشىمىن تاپقان.
ماسەلەن، كەگەن اۋدانى، بولەكساز اۋىلدىق وكرۋگىندە قازىرگى ۋاقىتتا «اۋىل ەل بەسىگى» باعدارلاماسى اياسىندا، «دانەكەر» جاۋاپكەرشىلىگى شەكتەۋلى سەرىكتەستىگىنىڭ باسشىلىعىمەن حالىقتى اۋىز سۋمەن قامتاماسىز ەتۋ ماقساتىندا اۋىل تۇرعىندارىنان 25 ادام جۇمىسپەن قامتىعان. بۇل دا، ءوز كەزەگىندە اۋىل حالقىنىڭ تۇرمىسىن جاقسارتۋعا قوسىلعان ۇلەس ەكەنى انىق.
وسى تەكتەس ءتىزىمدى جازيرالى جاركەنت ءوڭىرى جالعاي تۇسپەك. ءبىرى شارۋاشىلىققا، ەندىگىسى قۇرىلىس جۇمىستارىنا كوڭىل اۋدارىپ جاتسا، مۇنداعى جەرگىلىكتى كاسىپكەر بوبەكتەر قامىن كۇيىتتەۋدە. جەكە كاسىپكەر ت. ماكەجانوۆا 200 ورىندىق بالا باقشانى قولدانىسقا بەرگەن. عيماراتتىڭ جالپى اۋدانى 961،5 شارشى مەتر. جوبانى ىسكە اسىرۋعا 134 ملن تەنگە قارجى جۇمسالعان. باستاما «جەكە باستامالار» باعدارلاماسى اياسىندا جۇزەگە اسقان.
مەملەكەتتىك باعدارلامانىڭ شاراپاتى تيگەن ءوڭىردىڭ ساپىندا نارىنقولدىقتاردا بار. وندا دەنەشىنىقتىرۋ-ساۋىقتىرۋ كەشەنىنىڭ قۇرىلىسى ءجۇرىپ جاتىر. كەلىستى كەشەندى سالۋ ءۇشىن 110 جۇمىس ورنى پايدا بولىپ، اۋىل تۇرعىندارى جۇمىسپەن قامتىلعان. جۇمىسپەن قامتۋ ورتالىعىنداعى جۇمىسسىز رەتىندە تىركەۋدە تۇرعان ازاماتتار مەن ارنايى ماماندىعى بار جاستار دانەكەرلەۋ ءىسى، ەلەكتر جابدىقتاۋشى جانە باسقادا جۇمىستار اتقارۋدا.
وبلىس ورتالىعىنا ءتيىپ تۇرعان تەكەلى قالاسىندا دا 70 جۇمىس ورنى اشىلعان. بۇل ءبىز كورسەتكەن باستامالاردىڭ ىشىندەگى كورنەكتىسى. «تەحنو اۆيا گرۋپ» تىگىن سەحى. كاسىپورىن قورعانىش قۇرالدارىن وندىرۋمەن اينالىسادى. ايتا كەتۋ كەرەك، ءساۋىر ايىندا وبلىس ورتالىعى، تالدىقورعان قالاسىنان اشىلعان ەدى. ەندىگىدە ورىستەرى كەڭەيىپ تەكەلى قالاسىنان ورىن تەۋىپ وتىر.
تىگىن سەحى – ءبىر رەتتىك مەديسينالىق بەتپەردەلەر، حالاتتار، كومبينەزوندار جانە باسقا دا ارنايى كيىمدەردى تىگەدى. اتالعان سەرىكتەستىكتىڭ فيليال باسشىسى جارىلقاسىن بولات ۇلى.
باسشىلىقتىڭ ايتۋىنشا، سەحتىڭ الىپ جاتقان اۋماعى 350 شارشى مەتردى قۇرايدى. بۇگىندە ءوندىرىس ورنى 50 جوعارى جىلدامدىقتى، 10 ارنايى وندىرىستىك تىگىن ماشينالارىمەن قامتاماسىز ەتىلگەن. جۇمىس ورنىندا 70 ادام ەڭبەك ەتەدى. قىزمەتكەرلەر ەكى اۋىسىمدا جۇمىس جاسايدى. العاشقى ەلۋى كۇندىز، قالعان جيىرما تىگىنشى كەشكە قىزمەتىنە كىرسەدى. العاشقى كەزەڭنەن باستاپ كۇندىگىنە 18-20 مىڭ دانا، ايىنا 400 مىڭ دانا بەتپەردە تىگىپ وتىر. سونىمەن قاتار ايىنا 35 مىڭا جۋىق حالاتتار وندىرەدى. بۇل جوسپاردى ىسكە اسىرۋ ءۇشىن 19،0 ملن تەڭگە قارجى بولىنگەن.
ءىستىڭ العا باسۋىنا مىندەتتى تۇردە جۇيە كەرەك. وسى تۇرعىسىندا ءوندىرىس ورنى ەشكىمنەن قالىسپايدى. بارلىق ارەكەتى مەن باعدارى الدىن-الا دايىندالعان. ياعني، قولعا العان ىستەرىندە رەتتىلىك بار. سەح باسشىلىعىنىڭ جوسپارىنا سايكەس جۇمىس كەستەسى تولىق ازىرلەنگەن.
كاسىپورىن تامىز ايىنان باستاپ جەكە كومپانيالارعا، ياعني، مۇناي، ەنەرگەتيكا سالاسىنداعى ءوندىرىس ورنىدارى ءۇشىن ارنايى كيىم ازىرلەي باستاعان.
ءبىز تارقاتقان قىزمەتتەر ول ءبىر پاراسى عانا. ءدال وسىنداي جۇمىس ورىندارى وبلىستىڭ تۇكپىر – تۇكپىرىندە اشىلعان. نەگىزىندە ايماق باسشىسىنىڭ الدىعا قويعان جوسپارى ارتىعىمەن ورىندالعانىن باسا ايتقان ءجون. ويتكەنى بيىلعى جىلداعى جوسپار بويىنشا 48 999 جۇمىس ورنى قۇرىلادى دەپ مەجەلەنگەن ەدى.
2020 جىلى «ەڭبەك» باعدارلاماسىنىڭ ءبىرىنشى باعىتى بويىنشا 4040 ادامدى كاسىبي وقىتۋعا 2297،4 ملن تەڭگە بولىنگەن، سونىڭ ىشىندە 2505 ادامدى تەگىن كاسىبي تەحنيكالىق ءبىلىم مەن قىسقا مەرزىمدىك وقىتۋعا 594،4 ملن تەڭگە قاراستىرىلعان.
قازىرگى كەزدە ءوڭىردىڭ 15 وقۋ ورنى مەن 17 وقىتۋ ورتالىقتارىندا 45 ماماندىق بويىنشا قىسقا مەرزىمدىك وقىتۋعا 2528 ادام باعىتتالعان. سونىڭ 1396-سى وقۋىن اياقتادى، 782 ادام نەمەسە 56% تۇراقتى جۇمىسقا ورنالاستىرىلدى.
باعدارلامانىڭ ەكىنشى باعىتى بويىنشا 1094 ىقتيمال قاتىسۋشىلاردى شاعىن نەسيەلەندىرۋ ءۇشىن 4791،3 ملن تەڭگە، قالالاردا جانە اۋىلدا شاعىن نەسيەلەردى كەپىلدەندىرۋگە – 90،0 ملن تەڭگە، شاعىن قارجىلىق ۇيىمداردىڭ وپەراسيالىق شىعىندارىن سۋبسيديالاۋعا – 10 ملن تەڭگە بولىنگەن.
بۇگىنگى كۇنى اۋىلدىق جەرلەردە 3512،0 ملن تەڭگە سوماسىندا 859 ميكروكرەديتتەر بەرىلدى، قالالاردا 13 ادام 137،5 ملن. تەڭگە كولەمىندە ميكرو كرەديتالدى.
سول سياقتى «باستاۋ بيزنەس» جوباسى بويىنشا كاسىپكەرلىك نەگىزدەرىن وقىپ ۇيرەنۋگە 3645 ادام جىبەرىلدى. جاڭا بيزنەس-يدەيالارىن دامىتۋ ءۇشىن 2130 ادامعا 1299،2 ملن تەڭگە سوماسىندا مەملەكەتتىك گرانت بەرۋ قاراستىرىلعان. بۇگىنگى كۇنى 920،3 ملن تەڭگەگە 1795 گرانت بەرىلدى.
سونىمەن قاتار ءۇشىنشى باعىت اياسىندا 7580،2 ملن. تەڭگە بولىنگەن. ءۇشىنشى باعىتتىڭ بارلىق كورسەتكىشتەرى ارتىعىمەن ورىندالدى.
باتالوۆ سوزىندە تۇردى
اماندىق باتالوۆ بۇدان بۇرىن بيىل وڭىردە 46 مىڭنان استام جۇمىس ورنى اشىلاتىنىن ايتقان. ايماق باسشىسى “ەڭبەك” باعدارلاماسىنىڭ ماڭىزدىلىعىن ۇدايى ءسوز ەتىپ، ۇنەمى نازاردا ۇستايدى.
توتەنشە جاعداي جونىندەگى مەمكوميسسيانىڭ وتىرىسىندا مەملەكەت باسشىسى توقايەۆ وسى باعدارلامانى جۇزەگە اسىرۋ ءۇشىن 1 ترلن تەڭگە ءبولۋدى تاپسىرعان-دى.
“ونىڭ ىشىندە الماتى وبلىسىنا 109،2 ملرد.تەڭگە ءبولىندى. بۇل ءبىزدىڭ ءوڭىر ءۇشىن وتە ماڭىزدى جانە قاجەتتى قاراجات. ءبىرىنشى كەزەكتە حالىقتى جۇمىسپەن قامتۋ ماسەلەسىن شەشۋ ماڭىزدى.
ويتكەنى كوروناۆيرۋسقا بايلانىستى وبلىستىڭ كوپتەگەن تۇرعىندارى جۇمىسسىز قالدى. ولاردىڭ وتباسىلارىنا جاعداي جاساپ، جاڭا جۇمىس ورىندارىن اشۋ قاجەت.
بۇعان دەيىن جۇمىس جاساۋعا وسىنداي وراسان زور قاراجات بولىنگەن جوق. سوندىقتان ءبىز ولاردى بولگەندە جاۋاپكەرشىلىكپەن قاراۋىمىز كەرەك. ەسەپتى كەزدەسۋ، جەكە قابىلداۋلار كەزىندە تۇرعىندار جۇگىنگەن وبلىستىڭ اۋداندارى مەن قالالارىنا دا قاراجات بولەمىز”، – دەگەن بولاتىن بۇدان بۇرىن باتالوۆ.
بۇدان بولەك ول “ءتۇرلى فورۋم، كونفەرەنسيا وتكىزۋدى توقتاتىپ. وعان جۇمسالعان اقشانى حالىققا جۇمىس تاۋىپ بەرۋگە باعىتتاۋ كەرەكتىگىن” ايتقان.
“مەملەكەت باسشىسى ەڭ الدىمەن حالىقتىڭ الدىنداعى الەۋمەتتىك مىندەتتەمەلەردىڭ ورىندالۋىن قامتاماسىز ەتۋدى قاتاڭ تاپسىردى. وعان بىزدە قارجى تولىق كولەمدە قاراستىرىلعان. قاجەت بولسا، ماڭىزدى ەمەس شىعىنداردى قىسقارتۋ ەسەبىنەن بۇل قارجى كولەمىن ارتتىرا الامىز.
بيىلعى جىلى 46 مىڭنان استام جۇمىس ورنىن قۇرۋدى جوسپارلاپ وتىرمىز.
يميدجدىك شارالاردى وتكىزۋگە باعىتتالعان شىعىنداردى جانە بيۋدجەتتىڭ باسىمدىق بەرىلمەيتىن شىعىندارىن قىسقارتۋ، كولىك، جيھاز ساتىپ الۋدى توقتاتۋ قاجەت”، – دەگەن ەدى ايماق باسشىسى.
