الماتى وبلىسىندا كوپ بالالى جانە از قامتىلعان وتباسىلارىن قولداۋ ماقساتىندا الەۋمەتتىك كارتا ازىرلەنۋدە. جالپى وتكەن جىلى الەۋمەتتىك كومەكتىڭ ءتۇرلى فورمالارىنا 234 مىڭ ادام يە بولىپ، 13،8 ملرد. تەڭگە العان. بۇل جۇمىس جالعاسا بەرمەك.
بۇل تۋرالى ءوزىنىڭ ەسەپتى جيىنىندا الماتى وبلىسىنىڭ اكىمى اماندىق باتالوۆ ايتتى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
ا. باتالوۆتىڭ مالىمەتىنشە، حالىقتىڭ اتالعان ساناتىن قولداۋ ءۇشىن ءۇش ملرد. تەڭگە كولەمىندە قوسىمشا قارجى ءبولۋ مۇمكىندىكتەرى قاراستىرىلدى.
ماسەلەن. وبلىس ورتالىعىندا كوپ بالالى وتباسىلار ءۇشىن كوپ قاباتتى ەكى ءۇيدىڭ جوباسىن ازىرلەۋ جۇمىسى باستالدى، كوتتەدج قالاشىعىنان دا ءۇي ءبولۋ مۇمكىندىكتەرى قاراستىرىلادى. «7-20-25» باعدارلاماسى بويىنشا 1 ملن. تەڭگەدەن تۇرعىن ءۇي سەرتيفيكاتى بەرىلەدى، ونىڭ جيىنتىق سوماسى 300 ملن. تەڭگە.
تابيعي گازعا جەڭىلدىكپەن قوسۋ دا قاراستىرىلىپ وتىر. بۇل ماقساتقا 500 ملن. تەڭگە بولىنەدى.
16 مىڭ جەكە تۇرعىن ۇيلەرگە ۋلى گاز داچيكتەرى قايتارىمسىز ورناتىلادى، وعان دا 96 ملن. تەڭگە جۇمسالماق.
جىل سايىن از قامتىلعان جانە كوپ بالالى وتباسىلارىنىڭ بالالارىنا جوعارى وقۋ ورىندارىنا وقۋعا 100 گرانت بولىنەتىن بولادى. بۇل ماقساتقا 44،3 ملن. تەڭگە قاراستىرىلىپ وتىر. قازىرگى كەزدە گرانتتا 246 جاس وقىپ جاتىر.
از قامتىلعان وتباسىلارىنىڭ بالالارى مەكتەپتە ىستىق تاماقپەن 100% قامتىلادى. بۇگىنگى كۇنى وسىنداي 32 مىڭ بالا تەگىن ىستىق تاماقپەن، مەكتەپ فورماسىمەن، جازعى دەمالىسپەن قامتىلعان.
كوپ بالالى انالار ءۇشىن قالالىق قوعامدىق كولىكتە تەگىن ءجۇرۋ ماسەلەسى شەشىلگەن (200 ملن. تەڭگە). بۇعان دەيىن تەگىن جول ءجۇرۋ مۇمكىندىگىن 42 مىڭ مەكتەپ وقۋشىسى، ستۋدەنتتەر مەن زەينەتكەرلەر پايدالانىپ كەلدى.
وعان قوسا حالىقتىڭ الەۋمەتتىك ءالجۋاز توپتارىنا جاتاتىن وتباسىلارىنان شىققان 31 مىڭ بالانىڭ بالاباقشالاردا تاماعىن سۋبسيديالاۋ ويلاستىرىلدى، وعان بيۋدجەتتەن 1،2 ملرد. تەڭگە بولىنەدى.
بۇل ورايدا ءاربىر اۋدان مەن اۋىلدىق وكرۋگتەردە ەلەكتروندى الەۋمەتتىك كارتا جاسالادى. سونىمەن قاتار اۋدان ورتالىقتارى مەن قالالاردا «ءبىر تەرەزە» قاعيداتىمەن كوپ بالالى جانە از قامتىلعان وتباسىلارىنا قىزمەت كورسەتەتىن ورتالىقتار اشىلادى.
