Almaty oblysynda kóp balaly jáne az qamtylǵan otbasylaryn qoldaý maqsatynda Áleýmettik karta ázirlenýde. Jalpy ótken jyly áleýmettik kómektiń túrli formalaryna 234 myń adam ie bolyp, 13,8 mlrd. teńge alǵan. Bul jumys jalǵasa bermek.
Bul týraly óziniń esepti jiynynda Almaty oblysynyń ákimi Amandyq Batalov aitty, - dep habarlaidy Almaty oblysy ákiminiń baspasóz qyzmeti.
A. Batalovtyń málimetinshe, halyqtyń atalǵan sanatyn qoldaý úshin úsh mlrd. teńge kóleminde qosymsha qarjy bólý múmkindikteri qarastyryldy.
Máselen. oblys ortalyǵynda kóp balaly otbasylar úshin kóp qabatty eki úidiń jobasyn ázirleý jumysy bastaldy, kottedj qalashyǵynan da úi bólý múmkindikteri qarastyrylady. «7-20-25» baǵdarlamasy boiynsha 1 mln. teńgeden turǵyn úi sertifikaty beriledi, onyń jiyntyq somasy 300 mln. teńge.
Tabiǵi gazǵa jeńildikpen qosý da qarastyrylyp otyr. Bul maqsatqa 500 mln. teńge bólinedi.
16 myń jeke turǵyn úilerge ýly gaz datchikteri qaitarymsyz ornatylady, oǵan da 96 mln. teńge jumsalmaq.
Jyl saiyn az qamtylǵan jáne kóp balaly otbasylarynyń balalaryna joǵary oqý oryndaryna oqýǵa 100 grant bólinetin bolady. Bul maqsatqa 44,3 mln. teńge qarastyrylyp otyr. Qazirgi kezde grantta 246 jas oqyp jatyr.
Az qamtylǵan otbasylarynyń balalary mektepte ystyq tamaqpen 100% qamtylady. Búgingi kúni osyndai 32 myń bala tegin ystyq tamaqpen, mektep formasymen, jazǵy demalyspen qamtylǵan.
Kóp balaly analar úshin qalalyq qoǵamdyq kólikte tegin júrý máselesi sheshilgen (200 mln. teńge). Buǵan deiin tegin jol júrý múmkindigin 42 myń mektep oqýshysy, stýdentter men zeinetkerler paidalanyp keldi.
Oǵan qosa halyqtyń áleýmettik áljýaz toptaryna jatatyn otbasylarynan shyqqan 31 myń balanyń balabaqshalarda tamaǵyn sýbsidiialaý oilastyryldy, oǵan biýdjetten 1,2 mlrd. teńge bólinedi.
Bul oraida árbir aýdan men aýyldyq okrýgterde elektrondy Áleýmettik karta jasalady. Sonymen qatar aýdan ortalyqtary men qalalarda «Bir tereze» qaǵidatymen kóp balaly jáne az qamtylǵan otbasylaryna qyzmet kórsetetin ortalyqtar ashylady.
