Qazaqstanda úsh jylda 19 myń shaqyrymnan asa jol jóndeldi: kei baǵyttarda jol júrý ýaqyty eki esege qysqardy

Úkimet Memleket basshysy Qasym-Jomart Toqaevtyń "Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý" atty Qazaqstan halqyna joldaýynda bergen óńirlik kólik bailanysyn damytý jónindegi tapsyrmalaryn oryndaý aiasynda avtomobil, temirjol, aviatsiia jáne teńiz infraqurylymyn jańǵyrtýǵa, sondai-aq, logistikalyq baǵyttardy damytýǵa baǵyttalǵan keshendi sharalardy júzege asyryp jatyr. Basym baǵyttar - óńirler arasyndaǵy kólik bailanysyn nyǵaitý, jol júrý ýaqytyn qysqartý jáne negizgi halyqaralyq dálizderdegi júk aǵynyn jedeldetý, dep habarlaidy dalanews.kz.

Úsh jylda 19,1 myń shaqyrym jol salynyp, jóndeldi

2023-2025 jyldary Qazaqstanda 19,1 myń shaqyrym jol salyndy, rekonstrýktsiialaý jumystary júrgizilip, jóndeldi. 2026 jyly respýblikalyq jáne jergilikti mańyzy bar 11 myń shaqyrymnan asa jol rekonstrýktsiialaý, qurylys jáne jóndeý jumystarymen qamtyldy.

2029 jylǵa deiin respýblikalyq mańyzy bar joldardyń 97 paiyzyn normativtik jaǵdaiǵa keltirý josparlanyp otyr

2026 jyldyń sońyna qarai normativtik talaptarǵa sai keletin respýblikalyq mańyzy bar joldardyń úlesi 2023 jylǵy 92%-dan 95%-ǵa, al jergilikti mańyzy bar joldardyń úlesi 86%-dan 92%-ǵa deiin artýǵa tiis. 2029 jylǵa qarai bul kórsetkishterdi tiisinshe 97% jáne 94%-ǵa jetkizý kózdelgen.

Keibir baǵyttarda jol júrý ýaqyty eki eseden asa qysqardy

Batys Qazaqstan oblysynda Qaztalov, Jánibek jáne Bókei ordasy aýdandaryn oblys ortalyǵymen bailanystyratyn 245 shaqyrym joldy rekonstrýktsiialaý jáne kúrdeli jóndeý jumystary aiaqtaldy. 54 myń turǵyn úshin Oralǵa deiingi jol júrý ýaqyty 12-14 saǵattan 5-6 saǵatqa deiin qysqardy.

Búginde taǵy 800 shaqyrym temirjol salynyp jatyr

Keiingi bes jylda elimizde 911 shaqyrym jańa temirjol salyndy. Qazir taǵy 800 shaqyrym temirjoldyń qurylysy júrgizilip, qoldanystaǵy 2,6 myń shaqyrymǵa jýyq temirjol jańǵyrtylyp jatyr.

Ishki áýe reisteriniń sany aptasyna 890-ǵa jetti

2026 jyly Arqalyq áýejaiy qalpyna keltirilip, Astana, Almaty jáne Qostanaimen áýe qatynasy qaita jandandy. Jyl sońyna deiin Zaisan, Qatonqaraǵai jáne Kendirli kýrorttyq aimaǵyndaǵy jańa áýejailardyń qurylysyn aiaqtaý josparlanyp otyr. 2026 jylǵy qyrkúiektegi jaǵdai boiynsha ishki áýe qatynasy 60-qa jýyq baǵytty qamtyp, aptasyna 890 reis oryndalady.

Tsifrlandyrý jolaýshylar men júk tasymalyn jedeldetedi

Temirjolda poiyzdardyń qozǵalysyn naqty ýaqyt rejiminde baqylaýǵa múmkindik beretin GPS-trekerler negizindegi "Poiyzdar qozǵalysynyń onlain-tablosy" servisi engizildi. OneWeb jáne Starlink spýtnik internetin damytý jumystary jalǵasyp jatyr. Transkaspii halyqaralyq kólik baǵytynda Digital Trade Corridor platformasy engizilip, Tez Customs modýli kedendik rásimdeý ýaqytyn 8 saǵattan 30 minýtqa deiin qysqartty. Keshendi sharalar nátijesinde THKB boiynsha júkterdi jetkizý merzimi 38 táýlikten 13-17 táýlikke deiin qysqardy.