شاراعا قاتىسقان قوناقتاردى تاۋەلسىزدىك كۇنىمەن قۇتتىقتاعان وبلىس اكىمى اماندىق باتالوۆ:
– سىزدەردى ءوز اتىمنان جانە وبلىس تۇرعىندارىنىڭ اتىنان تاۋەلسىزدىك كۇنى مەرەكەسىمەن شىن جۇرەكتەن قۇتتىقتايمىن! الماتى وبلىسى اگرارلىق-يندۋستريالىق ايماق ەكەنىن بىلەسىزدەر. قابىلدانىپ جاتقان شارالاردىڭ ارقاسىندا ونەركاسىپتە 985 ملرد. تەڭگەنىڭ ءونىمى ءوندىرىلدى، اۋىل شارۋاشىلىعىندا بۇل كورسەتكىش 800 ملرد. تەڭگەدەن استى. جالپى 45 مىڭنان استام جاڭا جۇمىس ورىندارى قۇرىلدى. الەۋمەتتىك ماسەلەلەرگە، سونىڭ ىشىندە كوپ بالالى جانە از قامتىلعان وتباسىلارىن قولداۋعا ەرەكشە ءمان بەرىلۋدە.
ەلباسى ۇسىنعان بۇل باستامانى بۇگىنگى پرەزيدەنتىمىز قاسىم-جومارت توقايەۆ جالعاستىرىپ كەلەدى. وتكەن اپتادا بارلىق اۋدان، قالا اكىمدەرىنىڭ ەسەپتەرىن تىڭداپ، تۋىنداعان ماسەلەلەرىن شەشۋ جولدارىن تالقىلادىق. ماسەلەن، قاي جەرگە دارىگەرلىك امبۋلاتوريا سالۋ كەرەك، قاي اۋىلداردا جول جوندەۋ كەرەك، قاي جەردىڭ سۋ قۇبىرىن اۋىستىرۋ كەرەك، وسىنداي ماسەلەلەردىڭ قاي-قايسىسى دا ماڭىزدى.
وبلىس ەلدى مەكەندەرىن گازداندىرۋعا ءقازىر قوسىمشا قارجى ءبولىپ جاتىرمىز. ءبىزدىڭ ءوڭىر ينۆەستيسيا تارتۋدا بەلسەندىلىك تانىتۋدا. تانىمال «لۋكويل» كومپانياسىنىڭ زاۋىتى ءبىزدىڭ وبلىستا ىسكە كىرىسكەنىن ەستىگەن بولارسىزدار. تاعى ەكى ءىرى ينۆەستجوبا جۋىق ارادا جۇزەگە اسىرىلادى. وسىنىڭ بارىنە سىزدەر زور ۇلەس قوسقان تاۋەلسىزدىگىمىزدىڭ ارقاسىندا قول جەتكىزىپ وتىرمىز، – دەپ اتاپ ءوتتى ا. باتالوۆ. سونىمەن قاتار جەلتوقسان وقيعاسىنا قاتىسۋشىلاردىڭ بارلىعىنا ءبىر رەتتىك ماتەريالدىق كومەك رەتىندە 150 مىڭ تەڭگەدەن بەرىلەتىنىن ايتتى.
جەلتوقساندىقتار اتىنان «جەتىسۋلىق جەلتوقساندىقتار» قوعامدىق بىرلەستىگىنىڭ جەتەكشىسى ەرمۇحان ءجۇنىسحان، گۇلنار كوكسەگەن قىزى، سارسەنبەك ستامبەكوۆ، گۇلميرا بايسارينوۆا جانە ت.ب. ءسوز الدى.
تالدىقورعان قالاسىنىڭ تۇرعىنى ءلاززات جاپاشوۆا جەلتوقسان وقيعاسىنا قاتىسۋشىلاردىڭ ۇيلەرىن تابيعي گازعا تەگىن قوستىرۋ، سول سياقتى تاريحي وقيعاعا قاتىسۋشىلارعا ارناپ ستەلا مەن ەسكەرتكىش ورناتۋ تۋرالى ۇسىنىسىن ايتتى. سونىمەن بىرگە جەلتوقساندىقتاردىڭ ءتىزىمىن جاساپ، ولارعا ءتىزىم بويىنشا جىل سايىن 10 گەكتاردان جەر ءبولۋدى سۇرادى. سوندا ولاردىڭ ءارقايسىسىندا ءوز باسپاناسى بولادى دەپ ەسەپتەيدى ل. جاپاشوۆا.
اماندىق باتالوۆ وڭىردە جاسالعان الەۋمەتتىك كارتا اياسىندا گازعا قوسۋ ماسەلەسىن قاراستىرۋدى تاپسىردى. ال ستەلا ورناتۋ تۋرالى ۇسىنىس بويىنشا، وبلىس اكىمى «جاستار» ساياباعىنداعى تۋ تۇعىرىنىڭ ەتەك جاعىنا ەستەلىك تاقتا قويۋدى قاراستىرۋعا بولاتىنىن ايتتى. ال وبلىس بويىنشا جەر ۋچاسكەسىن الۋعا كەزەكتە 140 مىڭ ادام تۇرعانىن، سوندىقتان جەر تەلىمىن تەك كەزەك رەتىمەن الۋعا عانا مۇمكىندىك بولاتىنىن جەتكىزدى.
كەزدەسۋ سوڭىندا وبلىس اكىمىنىڭ العىس حاتتارى تاپسىرىلدى.
الماتى وبلىسى اكىمىنىڭ باسپا ءسوز قىزمەتى
