2019 جىلى «حالىقتىڭ ءال-اۋقاتىنىڭ ءوسۋى، تابىس پەن تۇرمىس ساپاسىن ارتتىرۋ» باعىتى باسشىلىققا الىنادى. بۇل ءوز كەزەگىندە تۇرعىن ۇيلەر، جولدار سالۋ، گازداندىرۋ، اۋىز سۋمەن قامتۋعا مۇمكىندىكتەر بەرمەك. بۇل تۋرالى تالدىقورعاندا وتكەن ەل الدىنداعى ەسەپ بەرۋ كەزدەسۋىندە وبلىس اكىمى اماندىق باتالوۆ ايتتى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
2018 جىلى قارجىلاندىرۋدىڭ بارلىق كوزدەرى ەسەبىنەن 713،2 مىڭ شارشى مەتر تۇرعىن ءۇي پايدالانۋعا بەرىلدى، سونىڭ ىشىندە «نۇرلى جەر» باعدارلاماسى بويىنشا بارلىعى 39 مىڭ شارشى مەتر سالىندى.
كەزەك رەتىنىڭ ارتۋىنا بايلانىستى بيىلعى جىلى «نۇرلى جەر» باعدارلاماسىمەن پايدالانۋعا بەرىلەتىن تۇرعىن ۇيلەر اۋقىمىن ەكى ەسە ارتتىرىپ، 80 مىڭ شارشى مەترگە جەتكىزبەك. سونىڭ ىشىندە 42،1 مىڭ شارشى مەتر نەسيەلىك، 32 مىڭ شارشى مەتر جالگەرلىك، 5،2 مىڭ شارشى مەتر كوممۋنالدىق تۇرعىن ۇيلەر، بارلىعى - 924 پاتەر سالىنادى.
«7-20-25» باعدارلاماسى بويىنشا 26 ماسسيۆ انىقتالىپ، وعان 2025 جىلعا دەيىن 4 ملن. شارشى مەتر ءۇي سالۋدى جوسپارلاپ وتىرمىز، سونىڭ ناتيجەسىندە 104 مىڭعا جۋىق وتباسى پاتەرلى بولادى.
العاشقى جارنانى تومەندەتۋ ماقساتىندا تۇرعىن ءۇي سەرتيفيكاتى ءۇشىن 1 ملرد. تەڭگە ءبولىندى. تۇرعىن ءۇي سەرتيفيكاتتارىن ءبولۋ ءتىزىمى كەڭەيتىلىپ، مۇعالىمدەر مەن مەديسينا قىزمەتكەرلەرىنە عانا ەمەس، حالىقتىڭ الەۋمەتتىك ءالجۋاز توپتارىنا، سونىڭ ىشىندە كوپ بالالى وتباسىلارعا دا بەرۋ تۋرالى شەشىم قابىلدادىق»، - دەدى وبلىس اكىمى اماندىق باتالوۆ.
