2019 jyly «Halyqtyń ál-aýqatynyń ósýi, tabys pen turmys sapasyn arttyrý» baǵyty basshylyqqa alynady. Bul óz kezeginde turǵyn úiler, joldar salý, gazdandyrý, aýyz sýmen qamtýǵa múmkindikter bermek. Bul týraly Taldyqorǵanda ótken el aldyndaǵy esep berý kezdesýinde oblys ákimi Amandyq Batalov aitty, - dep habarlaidy Almaty oblysy ákiminiń baspasóz qyzmeti.
2018 jyly qarjylandyrýdyń barlyq kózderi esebinen 713,2 myń sharshy metr turǵyn úi paidalanýǵa berildi, sonyń ishinde «Nurly Jer» baǵdarlamasy boiynsha barlyǵy 39 myń sharshy metr salyndy.
Kezek retiniń artýyna bailanysty biylǵy jyly «Nurly jer» baǵdarlamasymen paidalanýǵa beriletin turǵyn úiler aýqymyn eki ese arttyryp, 80 myń sharshy metrge jetkizbek. Sonyń ishinde 42,1 myń sharshy metr nesielik, 32 myń sharshy metr jalgerlik, 5,2 myń sharshy metr kommýnaldyq turǵyn úiler, barlyǵy - 924 páter salynady.
«7-20-25» baǵdarlamasy boiynsha 26 massiv anyqtalyp, oǵan 2025 jylǵa deiin 4 mln. sharshy metr úi salýdy josparlap otyrmyz, sonyń nátijesinde 104 myńǵa jýyq otbasy páterli bolady.
Alǵashqy jarnany tómendetý maqsatynda turǵyn úi sertifikaty úshin 1 mlrd. teńge bólindi. Turǵyn úi sertifikattaryn bólý tizimi keńeitilip, muǵalimder men meditsina qyzmetkerlerine ǵana emes, halyqtyń áleýmettik áljýaz toptaryna, sonyń ishinde kóp balaly otbasylarǵa da berý týraly sheshim qabyldadyq», - dedi oblys ákimi Amandyq Batalov.
