تۇركىستان قالاسىندا "تەگىن-قايىرىمدىلىق دۇكەنى" اشىلدى. مۇندا كوپبالالى انالار مەن تۇرمىسى تومەن وتباسىلارعا ازىق-تۇلىك پەن كيىم-كەشەك تەگىن بەرىلەدى.

 «ۇلى جەڭىس كۇنى»  قارساڭىندا اشىلۋ سالتاناتى وتكەن دۇكەن وبلىستىق اقساقالدار القاسى مەن «قوعامدىق كەلىسىم» كەڭەسىنىڭ باستاماسىمەن قولعا الىنعان.

اتالعان شاراعا قالا اكىمى ءا.وسەربايەۆ، كاسىپكەرلەر مەن ب ا ق وكىلدەرى قاتىستى.

ساۋابى مول ءىستىڭ تۇرعىندار يگىلىگى ءۇشىن قاجەتتىلىگى وراسان ەكەنىن ايتقان  قالا باسشىسى الىپبەك وسەربايەۆ ءوز تاراپىنان قولداۋعا دايىن ەكەندىگىن جەتكىزدى.

 «دۇكەن اپتانىڭ تەك سارسەنبى كۇنى جۇمىس ىستەيدى. مۇندا قالانىڭ 8 مولتەك اۋدانىنىڭ كوشە كوميتەتىنىڭ ءتوراعالارى جاساعان تىزىمدەر بويىنشا مۇقتاج وتباسىلارعا ازىق-تۇلىك، كيىم-كەشەك قاجەتىلىگىنە قاراي بەرىلەتىن بولادى.

ناقتىراق ايتقاندا، ءار اپتادا 40-50 ادامعا كومەك كورسەتىلمەك. ول تىزىمگە كوپبالالى جانە تۇرمىسى تومەن وتباسىلار ەنگىزىلەدى»، – دەدى وبلىستىق اقساقالدار القاسىنىڭ ءتوراعاسى ج.ازىرەتبەرگەنوۆ.

قازىرگى تاڭدا دۇكەندە 2 توننا ازىق-تۇلىك، 4 مىڭ دانا كيىم بار.

نەگىزىنەن دۇكەننىڭ قورى قالاداعى دەمەۋشىلەردىڭ ەسەبىنەن تولىقتىرىلادى.

اتالمىش دۇكەن قالامىزداعى ءال-فارابي كوشەسى №26 ءۇي مەكەنجايىندا ورنالاسقان.