قازاقستاندىقتاردىڭ اتىنان زاڭسىز راسىمدەلەتىن نەسيەلەرگە ازاماتتاردىڭ وزدەرى سەبەپكەر. بۇل تۋرالى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ مالىمدەدى، دەپ حابارلايدى Dalanews.kz.
ول قارجى الاياقتىعىنىڭ 95 پايىزى بانك قوسىمشالارىنداعى وسالدىقتان ەمەس ەكەنىن اشىپ ايتتى.
“الاياقتار نەسيە راسىمدەمەيدى. ازاماتتىڭ ءوزى بانككە نەمەسە ميكروقارجى ۇيىمىنا بارىپ، نەسيە الادى نە بولماسا شوتىنان قاراجات شەشىپ، كەيىن سول اقشانى الاياقتارعا ءوز قولىمەن بەرەدى. بارلىق ءراسىم زاڭدى تۇردە وتەدى – ەسق ارقىلى، راستاۋمەن”، – دەدى قيزاتوۆ.
سونداي-اق ول بانك قوسىمشالارى بۇزىلدى دەگەن جاپپاي دەرەكتىڭ راستالماعانىن ايتتى. اگەنتتىك جۇرگىزگەن جوسپاردان تىس تەكسەرۋ مۇنداي بۇزۋشىلىقتاردىڭ جوق ەكەنىن كورسەتكەن.
سونىمەن قاتار قيزاتوۆ قازىرگى زاڭنامادا الاياقتار ارقىلى الىنعان نەسيەلەر تەك سوت شەشىمىمەن كۇشىن جويا الاتىنىن اتاپ ءوتتى. الايدا جاڭا زاڭ جوباسىندا سوتقا دەيىنگى تارتىپپەن نەسيەنى جارامسىز دەپ تانۋ تەتىگى قاراستىرىلىپ جاتىر.
مۇنداي جاعدايدا نەسيە: “سۋىتۋ كەزەڭىندە” كليەنتتىڭ جەكە قاتىسۋى قامتاماسىز ەتىلمەسە جانە قارىز بەرۋگە ەكىنشى مارتە كەلىسىم الىنباسا جويىلۋى مۇمكىن.
