پوەزيالىق كەشكە وتىرار اۋدانىنىڭ اكىمى ەرلان ايتاحانوۆ قاتىسىپ، ايتىس سۇيەر قاۋىمنىڭ ىستىق ىقىلاسىنا بولەنە ءجۇرىپ قانشاما جىر سۇلەيلەرىن شىڭداپ، ايتىس دوداسىنا قانات قاقتىرعان حالىق اقىنىنىڭ حالىق الدىنداعى پوەزيالىق ەسەپ بەرۋ كەشىمەن قۇتتىقتادى.
– ءوزى دە – ولەڭ، ءومىرى دە – ولەڭ ەرگە بەرگىسىز قايسارلىق پەن دانالىقتىڭ يەسى، قازاقتىڭ اسەلحانى ايتىستىڭ دىڭگەگى بەرىك اقبەرەنى اتانسا، قۇلىنداي باپتاعان شاكىرتتەرى پىراقتاي توپ جارىپ، قازاق ادەبيەتى مەن مادەنيەتىنە دە ايرىقشا ۇلەس قوسىپ كەلەدى. قارا سوزدە – كيە بار. قارا سوزدە – جۇيە بار. ۇيقاسپەن ورىلگەن ءاربىر ولەڭ جولىندا اقىن انانىڭ ارقاسىنا ارقالاعانى ۇرپاقتىڭ ۇلاعاتى، ۇلدىڭ ۇلىقتى ابىرويى، قىزدىڭ ومىرلىك تاربيەسى ەكەنى بىردەن اڭعارىلادى. ءالى دە دارىن دارابوزدارىن باپتاپ، داڭقىن اسقاقتاتا بەرەرىڭىزگە سەنەمىز. عۇمىر جاسىڭىز ۇزاق، دەنىڭىز ساۋ بولسىن، – دەگەن ەرلان قۋانىش ۇلى اقىن اناعا ارناعان سىيلىعىن تابىستادى.
ارقالى اقىننىڭ شىعارماشىلىق كەشىنە قازاقستاننىڭ ەڭبەك سىڭىرگەن قايراتكەرى، حالىقارالىق «الاش» سىيلىعىنىڭ لاۋرەاتى، «قۇرمەت» وردەنىنىڭ يەگەرى، جازۋشى-دراماتۋرگ، تاريحشى ەركىنبەك تۇرىسوۆ جانە بەكەت تۇرعارايەۆ، مارحابات بايعۇت، نارماحان بەگالى ۇلى، بايان تىلەنشينا، سارسەن-بەك ساحابات سىندى زيالى قاۋىم وكىلدەرى اقىننىڭ شابىتتى شىعارماشىلىعى جولىنداعى ەل ۇلگى الار، كەلەشەككە تانىمدى، ءتالىمدى ءىز سالار ىستەرى جونىندە وي ءبولىستى.
تۇركىستان وبلىسىندا جۇلدىزداي جارقىراي شىعىپ، ءدۇيىم ەل الدىندا قارا ءسوزدىڭ ءقادىرى مەن قاسيەتىن ورامدى وي، وتكىر دە شىرايلى تىلمەن تىڭدارمان جۇرەگىنە جەتكىزىپ، قوعامعا قوزعاۋ سالار ساردار ءسوزدى تەرگەن اقىننىڭ شاكىرتتەرى مارجان ەسجانوۆا، انار جاپپارقۇلوۆا، داۋرەن اقساقالوۆتار ۇستازدارىنا جىردان شاشۋ شاشىپ، قازىرگى تاڭدا ۇستازدان ۇلگى العان شاكىرتتەر ۇستازعا اينالىپ، جاڭا بۋىننىڭ ونەر جاۋقازىندارىن جايقالتۋعا كۇش سالىپ جاتقاندىقتارىن دا جەتكىزدى.
رۋحاني مانگە تولى مادەني شارانى قالالىق «وتىرار» عىلىمي-امبەباپ كىتاپحاناسىنىڭ ديرەكتورى كۇليا ايداربەكوۆا جۇرگىزدى.
كەش اياسىندا اقىننىڭ سوزىنە جازىلعان اندەر شىرقالىپ، ولەڭدەرى وقىلدى.
وتىرار اۋدانى اكىمىنىڭ باسپا ءسوز قىزمەتى
